Senior citizens ug PWDs librehon sa bus - Soco

CEBU, Philippines - Aron mabatyagan kung unsay kahimtang sa transport system sa Sugbo, personal nga misakay og pangpublikong bus ang kandidato pagkabise-gobernador nga si Glenn Anthony Soco atol sa ikatulong hugna sa iyang caravan gikan sa Cebu North Bus Terminal padulong sa dakbayan sa Danao City .

Nakita ni Soco nga angayang regulahon ang mga pangpublikong bus alang sa seguridad sa mga pasahero.

Usa sa nakitang kinahanglang hatagan og pagtagad mao ang kalimpyo, seguridad ug ang pag-atiman sa mga pasahero.

Matud pa niya kung mapili  siyang bise-gobernador, usa sa hatagan og pagtagad ni Soco ang libreng pagsakay sa mga senior citizens ug mga tawo nga dunay kabilinggan sa panglawas.

Human sa iyang pamahaw sa Danao Fishport, ang Glenn Soco TA! caravan nipadayun sa lungsod sa Tabuelan agi sa Lugo-Sogod road.

Si Soco nanglamano sa katawhan sa merkado publiko sa dakbayan sa Toledo diin usab siya nagpalabay sa kagabhion sa wala pa nilahos sa lungsod sa Pinamungajan ug Aloguinsan pagkasunod adlaw.

Bisan nag-inusara siyang kandidato sa Pwersa ng Masang Pilipino (PMP), si Soco dugay na nga nilibot sa kabarangayan sa tibuok lalawigan sa Sugbo.

Napakyas si Soco niadtong eleksiyon sa 2010 diin siya ang pares ni Gob. Gwendolyn Garcia ubos sa One Cebu Party.

Ilang kauban ang kasamtangang gobernador Agnes Magpale nga karon anaa na sa Liberal Party ug mao ang kaatbang ni Soco.

Laing kaatbang ni Soco mao ang pag-umangkon ni Magpale nga si kanhi bise-mayor Ramon “Boboy” Durano IV sa One Cebu Party.

Si Soco ang labing batan-on sa edad nga 38 anyos tali nilang tulo nga mag-atbang sa maong posiyon. (BANAT NEWS)