Pag-atiman sa mga senior prayoridad ni Repdos

CEBU, Philippines - Pag-atiman sa kahimsog sa panglawas ingon man mga programa sa mga senior citizen ug livelihood project ang prayoridad  ni Aloguinsan mayoralty candidate Malou Repdos kun  modaug   siya  sa piniliay  sa Mayo.

Matud ni Repdos  nga atimanon niya ang kahimsog sa panglawas sa mga molupyo  pinaagi sa  pagpanghatag  og  libreng  tambal  sa  mga  health center  aron matubag diha -diha ang mga suliran  sa panglawas  sa  mga molupyo sa lungsod.

Gani matud pa ni Repdos nga apil sa iyang   ipatuman  mao ang pagpahigayon   og maayong  mga   programa   alang  sa mga lolo ug lola.

Kini  pinaagi  sa  pag-atiman  sa  ilang  panginahanglan   nga  may  labot  sa panglawas   nunot  sa ilang  edad.

Sa natad  sa panginabuhi-an gipasalig ni Repdos   nga motukod  siya  og  mga  livelihood project aron   may  panginabuhi-an ang mga molupyo nga dili na unya kinahanglang  mobiyahe  pa  sa  dakbayan sa Sugbo aron mangita og trabaho.  

Si Repdos misaad  usab  nga   iyang  ipatuman  ang   transparency   sa iyang pangagamhanan.

Si Repdos maoy kandidato sa Liberal Party nga  gipangunahan  ni Gubernatorial candidate Helario Junjun Davide III dinhi  sa lalawigan  batok sa asawa ni Mayor Chauncey Moreno.  (BANAT NEWS)