Drug user gipusil patay

CEBU, Philippines - Namatay  ang usa  ka  giingong  drug  user  human  kini  pusila sa wala hiilhing  kriminal  nga  nagsakay  og  motorsiklo  duol  sa barangay Hall sa  barangay Capitol Site ning  dakbayan  sa Sugbo kagahapon  sa alas 3:00  sa kaadlawon.

Ang biktima giila nga si Kevin Tañeza Anore, 22, molupyo sa maong dapit.

Sa pasiunang imbestigasyon ni SPO4 Rey Cuyos,  sa homicide section  sa Cebu City Police Office nasuta nga naglakaw ang biktima kauban ang wa hiilhing lalaki sa maong dapit  dihang  kalit lang  gihunongan  sa  usa  ka  motorsiklo  nga  gisakyan og  duha  ka wala  hiilhing  mga  lalaki.

Wala  makabantay  ang  biktima  dihang  kalit  kining  gipusil  sa  back rider  sa  maong  motor   hangtud  nga  natumba  kini sa karsada ug  nabugtoan  sa kinabuhi.

Dihadiha  mibiya  dayon  ang  mga kriminal  sa  maong  dapit .

Si SPO2 Teodoro Lumanas  sa CCPO   kinsa  maoy  miresponde  dayon  sa maong  hitabo nakapunit  og  lima ka basiyo sa  bala  sa kalibre 45 nga pistola  sa crime scene.

Samtang  sulod  sa walang bulsa  sa biktima nakuha  sa  kapolisan  ang   usa  ka syringe.

Si Romel Bondoc Ponce, 42, silingan  sa biktima mibutyag sa  kapolisan  nga  ang biktima kinsa usa ka illegal drug user, wala  na  mouli  sa ilang  balay  tulo  na ka semana ang milabay.

Padayon  pang  gipangita  sa kapolisan ang  mga kriminal. (BANAT NEWS)