Polis nanglubag og priso imbestigahon

CEBU, Philippines - Usa ka senior police officer ang gipasanginlang mibun-og sa usa ka piniriso human kini maglagot sa dihang wala tarunga sa pagtubag sa piniriso adtong Huwebes sa gabii sulod sa Dumanjug Police Station.

Si Rodrigo Reponte, 29, ug taga-Barangay Tubod Dugoan, nakaangkon og bun-og sa tuong bukton human kini gibunlot dayong lubag ni SPO1 John Eric Cordoviz, 39.

Si Cordoviz giingong duty niadtong higayuna  gipangutana niini si Reponte sa og tinubagan ang piniriso.

"Gitubag man siya ni Reponte nga ipatan-aw sa blotter iyang ngalan mura'g nasinta pud ang pulis unya init ang ulo," matud Insp. Robert Lucernas, hepe sa Dumanjug.

Si Cordoviz giingong nakainom adtong higayuna apan nagdumili sa pagkompirmar ang hepe kay wala kini ma-liquor test. Si Cordoviz na-assign isip beat patrol.

Si Reponte napriso niadtong Enero gumikan sa illegal nga paghupot og armas ug Comelec gun ban.

Matud ni Lucernas nga si Reponte aduna kini nervous breakdown ug gidala kini bag-uhay lang sa Vicente Sotto Memorial Medical Center aron ipa-check up apan wala na kini mag-imnanan og tambal human giingong gikabuhi sa tambal nga giresita sa doktor.

Apan base sa explanation report ni Cordoviz, si Lucernas mibutyag nga, giangkon sa iyang sakop nga nag-overreact lang siya adtong higayuna ug nangayo kini og pasaylo sa nabuhat.

Si Lucernas midugang nga isumitir na nila karong adlawa ang investigation report ngadto sa Provincial Investigation Detective and Management Branch (PIDMB).

Sumala pa ni Lucernas wala siya magkulang sa pagpahimangno sa iyang mga sakop nga dili moabuso sa ilang katungdanan ilabi na ang pagpanapat sa mga suspek.

"Gi-sigihan lang ko na sila ug pahimatngon nga dili gyud hilabtan kung dili sila ganahan makasuhan," matud ni Lucernas.

Gisuwayan og kuha sa Banat News og pamahayag si Cordoviz bahin sa maong kaso apan pakyas ang maong tinguha.

Si Sr. Supt. Patrocinio Comendador, director sa Cebu Provincial Police Office mitug-an sa Banat News nga nagpaabot pa siya sa investigation report kabahin sa maong kaso ug anha lang siya modesisyon kung  ibalhin ba kini og laing lugar kun makabasa na siya niini.

Hinuon gibutyag ni Comendador nga wala pa siya sukad makadawat og reklamo ug mga report nga dunay derogatory record si Cordoviz. (BANAT NEWS)