Naga City Jail naghuot sa inmates
CEBU, Philippines - Naghuot na ang Naga City Jail sumala pa sa Jail Warden niini nga si Senior Inspector Dennis Aliño.
Matud pa ni Aliño, 22 lang ka piniriso ang kapasidad sa prisohan apan sa pagkakaron aduna na kini 79 ka mga priso lakip ang duha ka babaye diin usa niini mao si Bella Ruby Santos, ang usa sa suspek sa pagdagit ug pagpatay sa batang si Ellah Joy Pique.
Apan nakasabot hinuon si Aliño nga ang maong problema sa kahuot sa mga prisohan dili lang sa Naga nahitabo.
Tungod sa kahuot, usa sa mga gi-monitor og maayo sa mga prisohan ang pagkuyanap sa sakit.
Ang siyudad sa Naga mihatag og sakyanan sa NCJ ug suplay sa gasolina alang sa ilang mga sakyanan. Nagpasalamat usab si Aliño sa gitagana nga luna diha sa barangay Naalad nga giandam aron tukoran og mas dakong pasilidad isip prisohan.
Kahinumduman nga si Mayor Valdemar Chiong mibutyag nga ang nahisgutang luna duna kini gilapdong 4,000 square meters.
Ang mayor mipadangat na kini og suwat ngadto sa Bureau of Jail Management and Penology (BJMP) aron magahinan og budget ang maong proyekto.
Si Aliño naglaom nga sulod niining tuiga maimplementar na ang nahisgutang proyekto. (BANAT NEWS)
- Latest
