Lumba kabayo ipahigayon sa SRP

CEBU, Philippines - Ang Cebu Horse Congress Festival karong tuiga anha ipahigayon sa South Road Properties (SRP)sulod sa tulo ka adlaw gikan  sa Abril 26 ngadto sa 28.

Si Anton Quisumbing nga maoy nasudnong pangulo sa Philippine Horsemen Federation (PHF) mipahibalo nga gibana-bana nila nga adunay 140 ka mahiligon sa pagsakay og kabayo ang mosalmot sa kalihukan.

Matud ni Quisumbing nga gawas sa mga dagku nga batid na kaayo mosakay og kabayo, adunay mga bata nga anak sa mga mahiligon mosakay og kabayo nga mopakita usab sa ilang abilidad.

Bukas sa publiko kining maong kalihukan ug walay bayad alang niadtong mosaksi sa pasundayag nga gialalayan sa pagpahigayon sa kagamhanan sa dakbayan pinaagi ni City Veterinarian Alice Utlang.

Gipasalig ni Dr. Utlang nga makalingaw kaayo tan-awon kining pagsakay og kabayo kay adunay lainlaing sitwasyon ang ilang pagahimoon sama sa pagpalayat sa kabayo sa gituyo pagmugna nga mga bungtod ug mga babag sa agianan.

Mga horse riders gikan sa ubang mga dapit sa nasud sama sa Bohol, Negros Oriental ug sa lainlaing dapit sa Mindanao mipadayag na nga mosalmot sila niining maong indigay kinsa ang labing bansay mosakay og kabayo.

Dunay tulo ka lainlaing kategoriya alang sa mga kabayo nga dagku, sa mga regular ang gidag-on ug niadtong mga gagmay.  (BANAT NEWS)