DA7 mitak-op sa women’s month

CEBU, Philippines - Ang Department of Agriculture Regional Field Unit VII (DA RFU 7) pormal nga mitapos sa kasaulogan niini sa Women’s Month nga gisaulog matag  Marso.

Ang pagtak-op sa maong selebrasyon gipangunahan ni DA 7 Regional Executive Director Angel Enriquez kinsa  namulong  bahin sa   gibug-aton    sa papel  sa kababayen-an  sa pagpalambo sa nasud.   

Apan  labaw  sa tanan matud  pa  ni Enriquez  nga mahinungdanon kaayo  ang  babaye sa  kiliran  sa lalaki kay  dili  makompleto ang lalaki kun wala ang presensya sa mga kababayen-an

Busa  iyang  giawhag  ang  kalalakin-an  nga  kinahanglang dili dagmalan ang mga babaye kundi  ampingan ug mahalon dili lamang sa panahon sa selebrasyon sa Women’s Month kundi matag adlaw gayud.

Samtang sa bahin usab ni OIC Regional Technical Director for Operations Tomasita Cadungog, kini miingon nga ang usa sa mga aktibidad sa pagsaulog sa Women’s Month mao ang selebrasyon sa women with disabilities uban sa tema nga "Babaeng May Kapansanan, Kasama ka sa Tuwid na Daan" ug duha ka  kawani  sa DA7 nga depektuso  og  panglawas   ang  gihatagan  og  pasidungog  tungod sa kinasing-kasing nga   pagserbisyo nila sa departamento sa agrikultura.

Gipasabot ni Cadungog nga wala nila gipakaubos ang mga lalaki nga aduna usay  deperensya sa  panglawas kay may  ipahigayon  man  usab nga kasaulogan sa Person with Disabilities (PWDs) sa matag  Hulyo .

Ang duha ka mga babaye nga empleyado sa DA 7 nga gipasidunggan mao sila si Soledad Bensi ug  si Renda Pomela kinsa  nakadawat  og  mga  pahalipay.

Samtang sila si Bensi ug Pomela nagpasalamat  usab sa ilang dakong pasalamat sa tanang empleyado sa DA 7 tungod   sa  suporta  nga  gihatag  niini  kanila luyo  sa physical  nilang depekto. (BANAT NEWS)