Suezo gustong 78th IB ibalik sa Tuburan

CEBU, Philippines - Dismayado si kanhi Tuburan mayor Rosemarie Suezo sa pagtangtang ni Mayor Aljun Diamante sa mga sakop sa 78th Infantry Battalion(IB) nga nadistino sa maong lungsod kaniadto nga maoy daku og papel sa pagpatunhay sa kahusay ug kalinaw   sa maong  lugar.

Matud  pa  ni Suezo  nga ang  mga sundawo  sa  78th IB maoy  gikahadlokan  sa  mga  rebelding  NPA  sa  maong  lungsod.

Matud ni  Suezo nga   dihang  nawagtang  ang mga  sundawo  sa kagamhanan  sa Tuburan  mibalik  ang  grupo  sa  mga  rebelde  ug  padayong  nanghulga  sa  mga  molupyo  sa  maong  lungsod.

Gibutyag ni Suezo atol sa press conference  kagahapon  nga kun  yak-an  sa  mga rebelde ang  usa ka lugar mahagba usab ang ekonomiya   niini tungod kay mahadlok naman ang mga negosyante pagbubo og dugang puhonan sa maong lugar.

Bisan ang runningmate ni Suezo nga si vice mayoralty candidate Daphnie Lagon mitataw   usab nga isip usa usab ka negosyante makahatag gyud og dili maayong imahe sa natad sa pamatigayon ang presensiya sa mga rebelde tungod kay makadisturbo kini sa kamalinawon sa lugar.

Gisugyot nila ni Suezo ug Lagon kang Mayor Diamante nga himoong prayoridad niini ang pagpatunhay sa kahusay ug kalinaw aron molambo ang ekonomiya sa lungsod.

Midugang   si Suezo  nga atol sa iyang pamuno-an kaniadto sa Tuburan , hapsay ug malinawon ang lungsod  bisan may  mga NPA  tungod  kay  gibantayan  man  usab sila  sa mga sundawo  sa 78th IB.

Gumikan niini  mihangyo sila   si Suezo ug Lagon  sa  mga kadagkoan  sa kagamhanan sa lalawigan  nga  ibalik  unta  pagdestino  ang 78th IB sa Tuburan aron matino ang  kamalinawon  sa  lungsod    ilabina ning  panahon  nga  naghinangat  ang election  nga  ginuntan  sa init  nga  panagsangka  sa  mga partidong  politikanhon  sa maong  lugar.

Kagahapon gipahigayon  usab ang caravan nila ni kanhi Mayor Suezo ug   sa  mga  sakop  sa tibuok line- up  niini gikan sa barangay Lantawan paingon sa Poblacion ug diin ipahigayon ang rally nga gitambongan sa gibana -banang kapin sa 10 mil ka mga suporter  kang  Suezo , Lagon  ug  sa tanang  kandidato  pagka-konsehal  sa maong  partido.  (BANAT NEWS)