Bella Ruby Santos gitugotang makapiyansa

CEBU, Philippines - Gitugotan sa korte si Bella Ruby Santos nga usa sa mga akusado sa pagdagit ug pagpatay sa 6-anyos nga si Ellah Joy Pique tungod sa giingong kahuyang sa ebidensya batok niini.

Ang desisyon sa korte nakapasagmuyo sa pamilyang Pique ilabi na sa amahan niini nga si Renante Pique kinsa mipadayag nga ilaha gihapong tahuron ang desisyon apan nagtuo siyang makombikto gihapon kini.

Gipahibalo ni Atty. Rameses Villagonzalo ug Atty. Julius Caesar Entise, abogado ni Santos huyang ra ang mga ebidensyang gipresentar sa prosekusyon, usa na niini ang managkalahi nga mga pamahayag sa batang witness kontra ni Santos nga matud pa niya mura’g gitudloan ra kini base sa ilang pag-obserbar sa cross examination sa kaso.

Midugang usab si Villagonzalo nga “gamay” na lang nga tayhop mabungkag na ang kaso. Matud pa niya nabawi ang ilahang paghulat tungod kay gitugotan si Santos ni Regional Trial Court Branch 6 Judge Ester Veloso nga makapiyansa og P500,000 base sa desisyong gipagawas niini niadtong Abril 10 nga gihatud kagahapon.

Kagahapon sa hapon gipasaka sa prosekusyon ang ilang motion for reconsideration.

Ang abogado sa prosekusyon nga si Inocencio dela Cerna mipasabot nga ang pagtugot nga makapiyansa si Santos wala magpasabot nga dili na kini makombikto.

Sa pikas bahin, mupasaka Og perjury batok sa mga witnes nga sila Ligaya Escultos ug Richard Ian Bruce Bansuan ang depensa inig ka human sa kaso tungod sa mga wala magkaparehas nga testimonya.

Si Santos ug uyab nga Briton nga si Ian Charles Griffiths maoy mga akusado sa maong krimen. (Fiona Jane V. Bacuado, CNU Intern/EIM) (BANAT NEWS)