Priso, ginang naghikog

CEBU, Philippines - Patay ang usa ka piniriso human tuyong nagkutlo sa iyang kinabuhi pinaagi sa paghikot og pisi sa iyang liog pasado alas-7 kagahapon sa buntag diha sulod sa karsel sa Criminal Investigation and Detection Group sa Camp Sotero Cabahug sa siyudad sa Sugbu.

Ang naghikog mao si Viersinito Gubalani, 47, molupyo sa barangay Capitol Site ning siyudad sa Sugbo kinsa gikatahong gipadakop sa asawa tungod sa pagka-hingulata niini.

Matud sa asawa nga si Magda (ngalan gipugngan) nga iyang gipadakop ang iyang bana kini aron unta patagmon.

Sa milabay’ng gabii nag-estorya pa sila sa iyang bana aron pasabton nga makagawas ra kini ug igo lang usa siyang gibalhog tungod sa nahitabo nila.

Ang desk officer niadtong tungura nga si PO3 Ramil Retuerto mibutyag nga nianang alas-2 sa kaadlawon iyang nabantayan nga naglurat pa ang mata ni Gubalani ug iya pa kining gitambagan nga pakatulgon apan igo lang kining gitubag og “wa pa ko ‘tulga sir.”

Nakurat na lang si Entuerto nianang pagkabuntag dihang sa pagbalik niya og tan-aw sa karsel mikaging na si Gubalani nga naglingkod sa inidiro sulod sa karsel nga adunay hikot nga pisi ang liog ug ang pikas tumoy didto sa kisame sa maong prisohan.

Ang hepe sa CIDG-7 Sr. Supt. Eddie Benigay mibutyag nga bisan pa man og moatras ang asawa ni Gubalani di gihapon kini makagawas tungod sa kaso niini sa paglapas sa Comelec gun ban ug Violence Against Women and Children.

Tungod sa nahitabo gipatangtang ni Benigay ang hayhayan sa sulod sa prisohan.  Girekomendar nga ipa-awtopsiya ang lawas ni Gubalane aron tinuon kung may foul play sa kamatayon niini.

Samtang usa ka ginang ang gituohang naghikog pinaagi sa pagpusil sa iyang kaugalingon sud sa iyang sakyanan nga nag-parking sa gawas sa compound  sa ilang panimalay sa dalan Ybañez sa barangay Pajo, dakbayan sa Lapulapu alas-7 pasado ang takna kagahapon sa buntag.

Si PO3 Winston Ybañez sa homicide section sa Lapulapu City Police Office (LLCPO) miila sa babaye nga mao si Lyneth Tagima Cruz -Stone, 44, buwag sa banang Amerikano.

Matud pa ni Ybañez ang amahan sa namatay nga si Edgar Tagima Cruz nga nahinabi sa kapolisan miingon nga alas- 11 pasado sa miaging gabii nananghid ang anak nga mogawas sa ilang panimalay.

Apan pagkabuntag gipahibalo na lang sila nga napalgan kining daw patay na sa sud sa iyang sakyanan hinungdan nga gisusi kini sa amahan gamit ang duplicate nga yawe sa sakyanan.

Gidala ang ginang sa mga sakop sa Emergency Rescue Unit Foundation ngadto sa Mactan Doctors Hospital apan patay na kini.

Matud pa ni Ybañez, usa ka kalibre .38 nga adunay lima ka mga buhing bala ug usa ka kabhang ang ilang nakit-an sa sud sa sa sakyanan nga gituohan nga maoy gigamit sa iyang paghikog.

Gisusi karon sa kapolisan kung personal nga problema ang hinungdan sa paghikog niini. Sumala pa ni Ybañez ang babaye suspek sa suway pagdasmag sa usa ka babaye kaniadto nga diin ang kaso gikatakdang husayon karong Lunes  diha sa korte.

Girekomendar nga ipa-awtopsiya ang patay’ng lawas sa ginang uban sa pagpa-paraffin test kung nakapabuto ba gyud kini og armas ug ingon man ballistic test sa armas nga nakuha diha sa sakyanan. (Romeo T.  Limpangog/EIM) (BANAT NEWS)