Kandidato gilimitihan paghimo’g citizen’s arrest

CEBU, Philippines - Ang kapolisan sa Central Visayas, sa pakigtambayayong    sa Commission on Elections, (COMELEC) mohimo  og sistema paghatag  og  limite  sa mga kandidato  sa pagpahigayon og citizen’s arrest   sa election  sa  Mayo. Si Chief Supt. Marcelo Garbo, Jr., ang hepe sa Police Regional Office 7, nagkanayon nga base sa mga kasinatian sa mga nangaging eleksyon sa rehiyon, giabusahan sa ubang  mga  kandidato  ang citizen’s arrest, nga nakapaaghat kanila  sa paglimite na unya niini.

“Although this is their right, we would like to limit this practice wherein the law enforcement will be having difficulty,” matud pang Garbo. Si Garbo nagkanayon nga iyang tahasan ang mga legal officer sa PRO 7 sa pagpahigayon sa protocol.

Giasoy ni  Garbo  nga  sa miaging  election  niadtong  2010 ug 2007, nagpahigayon og citizen’s arrest ang mga nagkadaiyang   grupo  sa  mga  politiko  sama  sa nahitabo  didto  sa siyudad  sa Bogo.

Siya nagkanayon nga ang pagpahigayon sa citizen’s arrest makaaghat lang og bawos-bawos sa nagkalain-laing partido  nga  makamugna   og kasamok.

Si Garbo ang usa sa mga opisyales nga mitambong sa gipahigayong Regional Joint Security Control Center (RJSCC) meeting kagahapon sa Central Command (CentCom) Office nga gitambongan  usab ni Comelec Regional Supervisor Temie Lambino ug mga kadagkuan usab sa CentCom sa Armed Forces of the Philippines. (Niña G. Sumacot/WC) (BANAT NEWS)