Repdos mibahad kurapsyon sa Aloguinsan sumpoon

CEBU, Philippines - Pagpakigbatok  sa kurapsyon   ug  limpyo  nga  serbisyo sa  lungsod   maoy  tumong ni konsehal Malou Repdos nga kandidato sa pagka- mayor ubos sa Liberal Party ( LP) sa Aloguinsan sa nagsingabot nga eleksiyon karong bulan sa Mayo.

Si konsehal Repdos kauban sa iyang running mate nga si konsehal Danny Margallo mipasalig atubangan sa tanang  molupyo sa lungsod  nga bungkagon  usab nila ang naghitak nga illegal nga sugal sa Aloguinsan nga wala hatagi og pag-atagad ni mayor Chauncey Moreno.

Atubangan sa gatosan ka mga tawo nga nitambong  sa ilang  rally  sa miaging  adlaw  giawhag  ni  Repdos  ang  tanan  nga  mokooperar  kanila aron matuman kining tanan nilang gitinguha   pagsunod  sa Daang  Matuwid program ni  Presidente Benigno Aquino III. Gani gisaway usab ni konsehal Repdos ang   kakuwang  sa  kahusay ug kalinaw sa ilang lungsod nga maoy   dakong  babag  sa  paglambo sa ekonomiya niini  sulod  sa pipila  na  ka tuig   ubos sa pagdumala  sa kasamtangang administrasyon.

Si Margallo   usab sa iyang bahin  mitataw atol sa interview sa Bantay Radyo   nga adbokasiya sa ilang grupo ang pagpatuman og tansparency sa lungsod nga wala karon  mahimo  sa kasamtangang administrasyon.

Si Repdos ug Margallo misaway  sa pamunoan ni mayor Moreno  gumikan  sa kadaghang  kwestyonabli nga transaksiyon   niini  sama sa kaso sa pagpamalit og  mga construction material nga wala moagi og subasta nga  karon  nasang-at  na  sa buhatan  sa Visayas  Ombudsman.

Samtang  gisuwayan  sa Banat News  pagkontak  si Moreno  aron  makapahayag  usab  sa iyang  bahin  apan  napakyas  ang  tanan  kay  busy  ang  iyang linya  sa telepono  sa opisina  ug  bisan  ang  iyang  cell  phone. (BANAT NEWS)