Mga mangingilad migamit sa 4Ps sa DSWD
CEBU, Philippines - Grupo sa mga mangingilad nanglista sa mga sakop sa matag sakop sa panimalay sa lungsod sa Cordova aron kunohay himoong benepisyaryo sa Pantawid Pamilyang Pilipino Program (4P’s) sa nasudnong kagamhanan nga gipatuman sa Department of Social Welfare and Development (DSWD) 7.
Ang grupo nga gikatahapang sinugo og mga politiko mopasalig sa matag panimalay nga hatagan sila og kuwarta ug makadawat og susama sa pension gikan sa DSWD7 matag buwan ubos sa 4Ps program.
Si Cristito Amoin, 38, minyo nga taga barangay Cogon sa nahisgotang lungsod midangop sa Banat News kalabot sa duha ka wala hiilhing babaye nga misaka sa ilang balay ug milista sa ilang mga ngalan ug sa ilang mga anak.
Unya giisplikaran kuno sila nga himoong membro sa 4Ps sa DSWD7 basta botohan nila ang kandidato nga gipaila niini.
Matud pa ni Amoin nga wa siya motuo kay daan na nga gikampanya sa DSWD ang “Bawal ang Epal†o gidili ang magpapapel nga kandidato niining programa nga 4Ps sa kagamhanan.
Kini tungod kay nasayran sa taga DSWD nga daghan kaayong kandidato nga mosakay niini aron ilaron ang mga katawhan pinaagi sa pasalig nga himoon silang membro sa 4Ps.
Si Aileen Lariba nga maoy 4P’s program information officer sa DSWD 7 dihang nahinabi sa mga tigbalita mipasabot nga gidili sa ilang buhatan nga gamiton ang maong programa sa kagamhanan sa politikanhong kalihokan.
Gitataw niya nga ang mga benepisyaryo sa maong programa mao kadtong kabus nga pamilya nga nalakip na sa ilang National Household Targeting System for Poverty Alleviation.
Midugang siya nga ang mga kabus nga inahan nga nagsabak ug adunay mga anak nga nagpanuigon og 14 anyos paubos maoy segurado kaayong mahimong membro sa 4Ps. Busa mipasidaan si Lariba nga kun may mga sinugo sa mga politiko nga mogamit sa programa nga 4Ps dili kini ipatagad kay usa kini ka pagpangilad. (/WC) (BANAT NEWS)
- Latest
