Cedula wagtangon nalang–BIR

CEBU, Philippines - Kun madayon ang sugyot ni Bureau of Internal Revenue (BIR) Commissioner Kim Jacinto-Henares nga wad-on na ang community taxes nga gipaagi sa “cedula,” dul-an sa P60 milyones ang mahanaw sa dakbayan sa Sugbo. Si City Treasurer Emma Villarete nagkanayon nga mokabat og dul-an sa P60 milyones ang ilang koleksyon gikan sa community taxes, ang ubang bahin niini ihatag ngadto sa mga barangay.

Matud ni Henares nga samtang ang nasudnong kagamhanan maoy nag-imprinta sa mga cedula nga ihatag nila sa lainlaing local government units, apan walay bisan usa ka sentimo nga mahiadto sa nasudnong kagamhanan. Ang cedula gisugdan sa pagpatuman atol nga ang Pilipinas gipaubos pa sa mga Espanyol ug gihimo kini nga maoy magsilbi nga identification card sa matag tawo. Kini maoy rason nga ang tanang tawo gidasig nga molukat gyud og cedula gikan sa kagamhanan. Hinoon, ang ngalan nga mabutang sa cedula namatud-an na nga dili igo nga basehanan nga tinuod kini nga ngalan sa tawo nga naghupot.

Ang cedula walay hulagway sa tawo nga giisyuhan ingon man walay laing ilhanan sa tinuoray niya nga pagkatawo nga pangitaon sa dili pa isyuhan sa cedula.

Apan ang cedula pagkakaron gikinahanglan kaayo sa mga mokuha og dokumento ilabi na kun magkinahanglan og notaryo sa abogado. Pagkakaron tag P5 ang bayranan sa mga indibidwal ug P500 sa mga kompaniya nga molukat og cedula, ingon man dugang P1 sa matag P1,000 nga kinitaan sa usa ka tawo o income sa kompaniya nga naglukat og cedula.  (BANAT NEWS)