Gikan nakig-inom namatay

CEBU, Philippines - Nahibulong karon ang kapolisan sa giingong kalit nga pagkamatay sa usa ka 27-anyos nga dalaga nga gikan nakig-inom uban sa mga higalang babaye ug usa ka turistang Hapones.

Ang babayeng namatay giila ni SPO1 Allan Pantaleon sa Homicide Section sa Lapulapu City Police Office nga mao si Princes Barizo, lumad nga taga San Mateo, Rizal, ug nag-istar usa ka dakong hotel resort sa barangay Marigondon, dakbayan sa Lapulapu.

Sumala pa ni Pantaleon, ang mga higala ni Barizo nga sila si Marisa Laluna, Sherry Mae Abella, Geraldin Narciso mibutyag nga kalit lang nawad-an og panimuot ang ilang higala pagbalik nila sa resort.

Matud pa nga gikan sa usa ka imnanan sa dalan A.S.  Fortuna sa barangay Banilad sa siyudad sa Mandaue ang grupo ug hubog na nga namauli kauban ang Hapon nga si Nakashima Kyun Yu. Sumala pa nga diha palang sa sakyanan nagsige na og suka si Barizo apan nagtuo lang sila bunga ra kadto sa iyang kahubog. Apan pag-abot nila sa resort  kalit nga nakuyapan ang dalaga hinungdan nga ilaha kining gidala sa Mactan Doctors Hospital sa barangay Basak sa maong dakbayan. Sa paglabay sa pipila ka oras matud pa ni Pantaleon nakabsan sa kinabuhi ang babaye. Wala pa masuta sa mga imbestigador kung unsay hinungdan sa kamatayon niini. (BANAT NEWS)