Ulitawo gilikod pagpusil bala milapos sa dughan

CEBU, Philippines - Namatay ang usa ka  ulitawo nga gidudahang hilabtanon human  kini  pusila  sa wala hiilhing  kriminal samtang  naglakaw paingon sa trabaho didto sa Sitio Relis, barangay Tulay, sa lungsod sa Minglanilla niadtong Biyernes sa alas 12:00 sa udto.

Ang biktima  mao si Junsen Espina, 23, ulitawo,  nga nagpuyo   sa nahisgutang lugar.

Si PO2 Nicky Carlo Plarisan sa Minglanilla Police Station mibutyag  sa Banat News nga ang biktima nga  usa  ka  construction  worker nagpaingon na  sa iyang trabaho   dihang  giatangan  sa  kriminal.

  Ang kriminal  nga  nagpahipi  sa daplin  sa karsada  misunod  sa biktima sa  paglabay  niini  dayon gibuko-buko  pagpusil  ug   milapos  ang  bala sa dughan  sa biktima.

Ang suspek abtik kaayong nakaikyas  human  matumba sa yuta  ang  biktima  ug  walay  nakasaksi  sa maong          hitabo.

Gihatud  sa  mga  tagtungod  ang  biktima ngadto  sa   Minglanilla District Hospital apan  namatay  kini  sa  mga ala 1:06 sa hapon.

Padayon  pang  gipangita  sa kapolisan  ang  kriminal  kinsa  gidudahan  nga  nanimawos  tungod  kay  ang  biktima  giingong  mahilabtanon sa  ilang  lugar.  (BANAT NEWS)