5 armado nadakpan
CEBU, Philippines - Lima ka armadong lalaki ang nasikop sa kapulisan sa Dumanjug kagahapon sa udto samtang nagpahulay sa payag sa Barangay Pawa lungsod sa Dumanjug.
Ang kapulisan nakadawat og taho nga ang maong mga suspek gituohang goons apan mibalibad sa pagkompirmar ang kapulisan kay wala pa kini ma-undergo og tactical interrogation.
Si Bobby de la Cerna, 24, taga-Malayahay, Argao, mao lay nailhan sa impormante nga maoy mipahibalo sa kapulisan apan ang upat ka kauban niini giingong gisikop human masuta nga mga armado kini.
Ang laing upat mao sila si Leomar Angana, 25, George Angana, ig-agaw ni Leomar, 37, taga- Barangay Candabong, lakip niini si Roel Gutana, 22, taga-Barangay Bullogan, pulos kini taga-Dumanjug. Apil na si Jimmy de la Cerna, ig-agaw ni Bobby, 19, taga-Barangay Malayahay.
Nakuha gikan sa maong mga suspek ang duha ka KG9 nga submachine pistols nga adunay duha ka magazines ug 20 ka bala; usa ka .45 pistol nga adunay magazine ug tulo ka bala; usa ka .357 revolver nga adunay upat ka bala; usa ka hand grenade ug duha ka kutsilyo.
Matud ni SPO3 Felipe Vibar, imbestigador sa Dumanjug Police Station, nga nadawat nila ang report mga ala 1:00 sa hapon nga anaa si Bobby sa Barangay Pawa. Si Bobby adunay warrant of arrest sa kasong murder nga gi-issue ni Regional Trial Court Judge Maximo Perez sa Branch 26 sa Argao.
Matud pa nga nakalitan ang grupo sa pag-abot sa kapulisan ug wala na makahigayon sa pagsukol. “Namahuway na man ni sila pag-abot sa tropa wala na sila musukol giaresto ra deritso,†matud ni Vibar.
Si Vibar midugang nga si Leomar bag-ohay lang nakapiyansa sa kasong illegal possession of firearms, frustrated murder ug possession of illegal drugs. Ang mga suspek anaa na karon sa karsel sa Dumanjug Police Station ug pasakaan kini og tukmang kasong illegal possession of firearms ug kalapasan sa Comelec gun ban sa Cebu Provincial Prosecutor’s Office.
Si Cebu Provincial Police Office (CPPO) Director Patrocinio Comendador mipadayag na nga makig-coordinate sa local nga mga kandidato ug i-validate ang tanang report sa presensiya sa mga goons nga giingong gigamit sa election. “We have methods in validating reports…you can really feel the heat as election is fast approaching and the PNP is in the middle ground and fair to all candidates,†matud niya. (BANAT NEWS)
- Latest
