Mag-uuma gisanggot sa silingan kritikal

CEBU, Philippines - Kritikal ang kahimtang sa usa ka mag-uuma human kini tigbasa og sanggot sa ulo sa iyang  silingang   mag-uuma   usab  nga iyang gikalalis   samtang  sila  nag-inom didto sa bukirang bahin sa barangay Mompeller sa lungsod sa Argao sa miaging  hapon.

Ang biktima mao si Miguel Vilamor, 49 , minyo, usa ka mag-uuma ug molupyo sa maong lugar.

Samtang ang suspek   mao si Fedirico Antiga, hingkod,  nga silingan  ra usab  sa  biktima

Si PO2 Renato Nacaytona sa Argao Police  Station  mibutyag  sa  Banat News   nga  ang biktima kauban sa mga barkada niini nag -inom   uban sa suspek   kinsa  nagtakin  og  sanggot.

Unya kalit  lang   mitumaw ang lalis sa  duha   ug  tungod  kay  mga lasbag  na  dali  kaayong  miinit  ang  ilang  lalis   hangtud  nga  gisumbag  sa biktima  ang suspek  hinungdan  nga  napawong  ang  panan-aw  niini  dihang  nasabak  sa nawong.

Gumikan  sa  kalagot  ug kapungot   gilanit  dayon  sa suspek  ang  iyang  sanggot  ug  gitigbas  ang ulo  sa biktima  hinungdan  nga  mibuhagay  dayon  ang  dugo  niini.

Ang biktima daling gihatud sa Isidro Kintanar Memorial hospital sa lungsod apan gi-transfer dayun kini sa tambalanan  sa dakbayan sa Sugbo.

Samtang ang suspek padayon pa  karong gipangita sa kapolisan  human  kini  molayas. (BANAT NEWS)