85 ka priso sa Talisay makabotar sa election
CEBU, Philippines - Mikabat sa 85 ka mga inmates sa Talisay City Jail sa barangay Maghaway ang makabotar karong umaabot eleksiyon sa Mayo niining tuiga.
Si Jail Officer 1 Rona Espinosa nagkanayon nga ang TCJ dunay 262 ka mga inmates ug 85 lang nila ang makabotar.
Ang Comelec miluwat sa Resolution No. 9371 niadtong Marso 6, 2012 nga mao ang pagpahigayon og pagpang-rehistro ug pagpabotar sa mga detainees diha sulod sa bilanggoan nga nagpanuigon og 18-anyos pataas. Kini may kalambigitan sa national nga eleksiyon karong Mayo. Si Chief Inspector Gil Inopia Jr. mipadangat kini og suwat ngadto kang Talisay City Comelec officer Corazon Moran kung aduna bay on-site o off-site voting alang sa mga inmates.
Matud ni Inopia nga buot lang silang masayod sa set-up alang sa eleksiyon sa Mayo aron usab sila makapangandam.
Si Moran sa iyang bahin, nagkanayon kini nga ang maong concern ni Inopia napadangat na niya kini ngadto sa Comelec regional office aron mahatagan kini og aksiyon. (BANAT NEWS)
- Latest
