1 angol sa duha ka sunog

CEBU, Philippines - Miulbo ang dakong sunog  sa sitio Baca, barangay Apas pasado alas 11:00 kagahapon sa buntag diin miugdaw kini og dul-an napulo ka balay ug miangol og usa ka tawo.

Ang naangol nailhan nga si Remedios Manapsal, hingkod, kinsa  napaso  sa nawong ug  bukton. Giingong nagsugod ang kayo  sa gipaabangang balay sa usa ka ginganlan og Raquel Cahibaybayan nga anak ni Manapsal.

Matud pa ni Cebu City fire Marshall William Tacaldo nga giisa ang alarma sa sunog ngadto sa 3rd alarm ug gibana-banang mokabat sa P350 mil  ang danyos sa mga nasunog.

Dugang pa ni Tacaldo nga nakontrolar ang  maong sunog sulod lamang sa 19 ka minutos ug ang mga balay   nga naugdaw pulos  ginama sa   gaan  nga  materiyales.

Gipasabot usab ni Tacaldo napaso    ang biktima  kay  dugay  kining  nakagawas  sa ilang  balay  nga nasunog  kay  nanguha  pa  siya  sa  uban  nilang  mga  butang sa sulod  sa ilang  balay.

Matud pa ni Tacaldo nga ila pang gisuta karon  ang hinungdan sa maong sunog ug kun   diin gayud kini magsugod.

Hinuon gihulagway ni Tacaldo nga dili  kaayo grabi ang naangkong paso ni Manapsal ug dali usab kining natagad sa mga rescue team.

Gawas sa  mga  balay nga nasunog, nasuta usab nga adunay duha ka sakyanang   gilamoy sa kayo nga  mao  ang Volkswagen ug Mitsubishi Adventure. Ang  maong  mga sakyanan  wa na  makuha  sa  mga  tag-iya  dihang  kalit  nga misilaob  ang  palibot  sa maong  lugar  nga nahimutangan niini.

Samtang, igo na lang usab sa paghilak si Jasmine Sestoso, trabahante sa dakong mall dihang sa iyang pag-abot  abo   na ang iyang   mga butang sulod  sa balay  nga  iyang  giabangan nga nahilakip  sa pagkaugdaw  sa maong  sunog.

Samtang  didto  sa isla  sa Bantayan  tulo usab ka balay  ang  naugdaw  sa sunog  nga  miigo  sa barangay  Sulangan, lungsod  sa Bantayan  sa maong  isla  sa miaging  hapon.

Ang  mga  tag-iya  sa maong  mga  balay  mao  sila  si Virgilio Necesario Jr.,  kinsa  kanhi  kapitan  sa maong  barangay, Baldemiro Jumawan ug Merrari Santillan.

Si FO3 Jose Dioscoro Aniban,  fire investigator  sa Bantayan  Fire Station  mibutyag  sa Banat News  nga  ang  kayo  nagsugod  sa ikaduhang  andana  sa balay  ni Necesario  ug  dali kaayo  kining  nakapagan  sa  kasikbit  nga  mga balay. (BANAT NEWS)