Isla sa Hilantagaan way suga 3 ka buwan na
CEBU, Philippines - Tulo na ka buwan nga way suga ang isla sa Hilantagaan, sakop sa lungsod sa Santa Fe sa Bantayan Islands sumala pa ni 4th District Rep. Benhur Salimbangon.
Kini tungod sa pagkaguba sa generator sa kuryente sa maong isla nga maoy gisaligan sa kapin sa usa ka libo ka mga pamilya nga nagpuyo sa maong lugar.
Gumikan niini ang katawhan sa maong isla naglisod na usab karon sa pagkuha sa tinubdan sa ilang tubig nga magamit ug mainom.
Si Rep. Salimbangon mipadayag sa iyang kadismaya sa kagamhanan karon sa lalawigan sa Sugbo tungod kay dugay na silang nakahatag og report sa Kapitolyo labot sa maong suliran ug nanghangyo nga katabangan sila sa ilang problema sa kuryente ug tubig.
Apan hangtud karon wala pa gihapon makahimo og lakang ang namunuan karon sa Kapitolyo aron masulbad ang maong suliran.
Hinuon ang buhatan ni Acting Gov. Agnes Magpale mipadayag sa kaandam sa pagtabang nga masulbad ang maong problema .
Gipasusi pa sa acting governor sa iyang mga tinugyanan sa Kapitolyo ang mga butang nga angay buhaton sa kagamhanan sa lalawigan kalabot ning maong suliran.
Nasayran nga sa administrasyon ni suspended Gov. Gwen Garcia ang maong suliran maatiman dayon tungod kay ang maong proyekto usa sa 12 point agenda nga iyang gihatagan og pagtagad kaniadto sa wala pa siya masuspeso. (BANAT NEWS)
- Latest
