Joavan ‘nagsukbit’ og armas

CEBU, Philippines - Ang sinagop ni incumbent Mayor Socrates Fernandez nga si Joavan Fernandez gipasanginlang nagtak-in og pistola samtang namilit og mga campaign posters niadtong Lunes sa hapon diha sa sitio Kawayanan, barangay Lagtang, dakbayan sa Talisay.

Si Florita Echavez Rosas, 54, residente sa maong dapit maoy nagpa-blotter diha sa Talisay City Police Station kabahin sa maong insidente. Sa imbestigasyon sa kapolisan giingong si Joavan mianha sa lugar ug namilit og mga poster, apan walay nakatala sa blotter kung kang kinsang campaign poster ang gipapilit niini.

Giingong si Joavan naabot og pamilit og mga campaign poster diha sa nahimutangan sa balay ni Rosas.

Sumala pa sa blotter, gibadlong ni Rosas si Joavan nga dili lang papilitan og mga poster diha sa ilang lugar apan giingong nasuko kini ug mibalik kini ngadto sa iyang sakyanan ug pagbalik giingong duna nay giluklok nga pistola sa likod niini.

Si Joavan giingong nagpadayon og pagpamilit og mga posters samtang nagluklok og pistola ug sa kahadlok ni Rosas wala na lang usab kini magbanha apan mi-report kini sa mga polis sa maong insidente.

Kahinumduman nga niadtong Domingo atol sa caravan sa Alayon Party si Joavan nabantayan kining nagbutang og blinker sa iyang sakyanan samtang mikuyog sa convoy sa caravan.

Ang Banat News misuway og tawag ni Joavan aron makuhaan kini og pamahayag sa nahisgutang pasangil batok kaniya apan dili ma-contact ang iyang mga numero sa cellphone.

Sa laing bahin, si Superintendent Elmer Lim, officer-in-charge sa Talisay City Police Station nagkanayon kini nga i-monitor nila si Joavan pagpiho kung magdala-dala ba gyud kini og armas.

Si Lim miawhag sa publiko nga kung dunay mga tawong ilang mahibaw-an nga magdala-dala og armas i-report dayon kini sa polis o ba kaha direkta ngadto kaniya aron maaksiyonan dayon kini. (BANAT NEWS)