Duha gipamusil patay

CEBU, Philippines - Duha ka mga lalaki ang gipamusil patay kagahapong adlawa sa Cebu City ug usa sa mga biktima kanhi police asset sa gibungkag nga Vice Control Section sa Cebu City Police Office apan giingong napriso usab kaniadto ug nakagawas niadto lang tuig 2008.

Giila ni SPO1 Victor Ruel Ayuman sa Homicide Section ang kanhi police asset mao si Alyndon Salimbagat nga temporaryong nagpuyo sa barangay Carreta ning dakbayan apan lumad nga taga Aloguinsan, Cebu.

Matud pa ni Ayuman sa Banat News sa interbyu pinaagi sa telepono, nagmaneho og motorsiklo ang biktima dihang gikasugat niini ang nag-inusarang killer nga nagmaneho usab og motor.

“Nagtagbo ni sila sa lugar (sa Samson Road) unya kalit gipusil sa suspek,” matud pa niya. Human matumba, mikaratil og dagan ang biktima padung sa direksyon sa Salinas Drive apan mi- U-turn ang gunman ug gigukod kini ug giusban og pusil tulo ka higayon.

Ang biktima nga namatay dihadiha nakaangkon og samad pinusilan sa tangkugo, tiyan, paa, ug pus-on sumala pa ni Ayuman. Ang mamumuno daling miikyas padung sa dalan Gorordo ug wala na igkita pa.

Gisubay pa sa imbestigasyon kung unsang kaso ang gikalambigitan sa biktima niadtong napriso ug uban pang posibleng anggulo ug motibo kini aron pagsusi kung duna ba kini koneksyon sa iyang kamatayon.

Samtang pasado alas-2 sa kaadlawon diha sa sitio Zapatera sa Barangay Barrio Luz, usa ka giila sa ngalang alyas Badang ang gipaulanan og bala ug napatay sa duha ka mga lalaking sakay sa usa ka Rosario Taxi.

Usa ka expired nga driver’s license nga adunay ngalang Rodrigo Cansancio gikan sa biktima ang nakuha sa kapolisan.

Sa pakighinabi sa Banat News ni SPO3 Rey Cuyos sa Homicide Section, mipadayag kini nga nagbaklay sa maong dapit ang biktima dihang naagian sa usa ka Rosario Taxi.

Sumala pa nga duha ka mga lalaking sakay sa maong taksi ang nanganaog ug gipusil ang biktima ug yanong nanakay og balik ug mibiya sa lugar.

Ang biktima nakaangkon og samad pinusilan sa iyang walang bahin sa ilokan, tuong bahin sa tiyan ug suwang nga miresulta sa iyang kamatayon.

Matud pa ni Cuyos nagpangutana na sila sa kompanya sa Rosario Taxi aron masubay si kinsa ang drayber sa maong sakyanan nianang orasa. Nakuha sa crime scene ang tulo ka kabhang ug slug sa kalibre .45 nga maoy gituohang gigamit sa pagpamusil. (BANAT NEWS)