2 patay sa ‘shootout’ sa checkpoint sa mga tanod

CEBU, Philippines - Duha ka mga tawo ang namatay sa nahitabong “shootout”  diha sa usa ka checkpoint  niadtong Domingo sa tungang gabii sa Barangay San Dionisio, San Rafael, Iloilo.

Giila sa hepe sa kapolisan sa maong lungsod nga si Chief Insp. Wilfredo Rios, San Rafael ang mga namatay mao sila si  Rex Belgira, 24, usa ka barangay tanod sa San Dionisio, ug Gilbert Italia, 34, taga Barangay San Antonio, lungsod sa Barotac Viejo.

Ang ig-agaw ni Italia nga si Hernani Pulmones, 45, kinsa usa ka retiradong miyembro sa Philippine Army  nga taga Barangay del Pilar, Barotac Viejo, natapsingan sa likod.

Matud pa ni Rios nga si Belgira, uban sa tulo ka mga tanod nagbutang og improvised checkpoint sa maong lugar human nakadawat og impormasyon ang amahan niini kinsa maoy barangay kapitan nga ginganlan og Remy kabahin sa report nga dunay mangaging mga kriminal sa maong dapit.

Si Pulmones, kinsa nagmaneho sa iyang motorsiklo uban si Italia nangagi sa maong dapit apan naalarma tungod sa pagpara kanila sa mga armadong lalaki.

Matud pa dunay buto sa armas nga nadungog gikan sa habig ni Pulmones ug nahagba si Belgira, tungod niini ang ubang mga tanod mibawos usab og pabuto ug naigo si Italia ug natapsingan si Pulmones.

Padayon pa karon ang imbestigasyon kung si kinsa nila ni Pulmones ug Italia ang nakapusil kang Belgira, samtang kusganong nanghimakak ang tulo ka mga tanod nga niapil sila sa pagpamusil nila ni Pulmones ug Italia. (/EIM) (BANAT NEWS)