Suspek nga mipusil sa enforcer mitahan

CEBU, Philippines - Mitahan sa buhatan sa kapolisan sa lungsod sa Cordova ang usa ka suspetsadong  mipusil  sa usa ka traffic enforcer  sa maong  lungsod.

Si SPO1 Llovero “Beloy”  Agosto sa kapolisan sa maong lungsod nga nahinabi sa Banat News miila sa mitahan ngadto sa ilang buhatan nga mao si Hermie Casquejo Villasor, 25, nga nagpuyo sa barangay Poblacion sa maong lungsod.

Matud pa ni SPO1 Agosto nga nakahukom sa pagtahan sa iyang kaugalingon si Villasor dihang nasayran   ang mga huhungihong sa ilang mga silingan nga kini maoy gikatahapan nga nagpusil kang Diomedes Pacaldo, 43, nga nagpuyo sa maong dapit.

Si Villasor  mihimakak nga maoy nagpusil sa biktima ug mipadayag nga dugay  na  silang  nagkabangi  ug gikalimtan na niya ang maong  hitabo. Matud pa  niya   si Pacaldo  midakop   kaniya   dihang  nakalapas  siya  sa balaod  sa   trapiko  didto  sa Cordova  pipila  na  ka buwan  ang  milabay.

Kini ang hinungdan sa iyang pagpakita sa buhatan sa kapolisan sa maong lungsod tungod kay buot lamang niyang kalimpiyohan ang iyang ngalan   gikan  sa mga  pasangil  ug katahap  nga  siya  maoy  miluthang  sa biktima. 

  Si Chief Inspector Alvin Balio, hepe sa kapolisan sa maong lungsod  mibutyag  usab nga nakahukom sa pagpaubos sa paraffin test ni Villasor  sa pagsuta kun nakapaboto ba kini og armas.

Nasayran nga nakigkukabildo si Pacaldo uban sa pipila ka mga silingan sa daplin sa karsada duol sa  balay niini dihang kalit lang mitumaw ang motorsiklo nga giluwanan sa duha ka wala hiilhing lalaki.

Unya  ang   angkas nga lalaki niini  sa  luyo  maoy kalit   nga  miibot sa   iyang  armas nga kalibre .45 ug gipusil ang biktima sa makadaghang higayon  sa iyang bukobuko, bukton, paa ug uban pang bahin sa kalawasan. (WC) (BANAT NEWS)