Gipusil angol sa kalalis

CEBU, Philippines - Nalandig sa tambalanan ang usa ka 56-anyos nga lalaki human kini pusila sa iyang kalalis niadtong Huwebes Santo sa hapon diha sa sitio Didos, barangay Linao, dakbayan sa Talisay.  

Ang biktimang si Germiniano Cañeda, residente sa maong dapit kinsa nakaangkon og samad pinusilan sa tuong bahin sa likod daling gidala ngadto sa Talisay City District Hospital apan gibalhin kini ngadto sa Vicente Sotto Memorial Medical Center.  

Ang suspetsado nga nailhan lang sa ngalan nga “Minmin” dali kining misibat human sa hitabo. 

Ang gwardiya sa TCDH maoy mi-report ngadto sa Talisay City Police Station kabahin sa hitabo pinaagi sa pagtawag sa telepono.  

Sila si SPO1 Rolando Bastida, PO3 Benedicto Lasque, PO3 Ferdinand Pablo ug PO3 Roy Lofranco ang daling miresponde sa nahisgutang report.   Sa imbestigasyon sa maong mga polis nasuta nga mga alas 2:45 sa hapon sa nahisgutang adlaw ang suspetsado ug biktima nagkalalis kini.  

Taliwala sa panaglalis sa duha giingong gisukmag sa suspetsado ang nawong sa biktima ug wala pa kini makontento gipusil usab ang biktima.

Ang kapolisan nagpahigayon og follow-up nga imbestigasyon sa insidente. Sa laing bahin, nadetiner sa Talisay City Police Station ang usa ka 16-anyos nga bayong-bayong human kini masakping naghupot sa revolver kagahapon sa kadlawon diha sa usa ka beach resort sa barangay Poblacion, dakbayan sa Talisay. 

Ang suspetsado kinsa residente usab sa dakbayan sa Talisay naimbargohan kini og usa ka kalibre .357 revolver nga dunay upat ka mga buhing bala sa kalibre .38 revolver nila ni PO1 Stephen Sefuesca ug PO1 Edwin Campomanes uban sa tanod sa barangay Poblacion nga si Ruel Tabelon.   Usa ka concerned citizen kinsa diha usab sa beach resort ang daling mi-report ngadto sa police station kabahin sa usa ka armadong tawo.

 Ang nahisgutang mga polis ug tanod daling miresponde sa maong report giingong naaktohan nila ang maong suspetsado nga nadala sa maong armas.   Ang suspetsado nakalapas kini sa Comelec gun ban. (BANAT NEWS)