Lahugay sa mga opisyal sa polis epektibo

CEBU, Philippines - Epektibo  ang lahugay sa mga commander in chief sa Cebu City police office.

Ang hepe sa kapolisan sa dakbayan sa Sugbo, Sr. Supt Mariano Natuel mibutyag nga gihimo ang paglahugay tungod kay daghang opisyal  nakatakdang   moretiro.

Ang  lahugay  usa  sa labing  epektibong  paagi  aron  kahatagan   og  higayon  ang  mangulo sa   matag  departamento  nga  mosaka  usab  ang  ranggo.

Matud pa ni Natuel nga adunay mga posisyon nga wala lang ilisi tungod  kay bag-o lang sila nga nadestino niini ug epektibo usab sila sa ilang mga tagsa-tagsa ka puwesto.

Si Chief Insp. Renero Agustin mao na karon ang bag-ong hepe sa Police Station 2 human kini mahepe sa Punta Princesa Police Station  ug pulihan usab kini ni Insp. Chuck Barandog nga gikan usab sa Police station 2.

Samtang si Sr. Insp. Jose Gesto nga gikan sa Police Station 6 adto usab kini ibalhin  sa Police Station 8 samtang ang hepe  sa Police Station 8 nga si Sr. Insp. Michael Angelo Beltran adto usab kini ibutang sa Police Station 11.

 Ang hepe sa Police Station 11 nga si Insp. Manuel Cañete ibutang usab isip hepe sa kapolisan sa Homicide Section.

Ang hepe usab sa Homicide Section nga si Sr. Insp. Francis Errol Deveyra adto kini  ibalhin  sa Police Station 2 isip Deputy Chief.

Samtang si Insp. William Tacaldo nga maoy deputy chief for administration  sa City intelligence Branch mao na usab karon ang hepe sa kapolisan sa theft and robbery section.

Nagpabilin sa ilang pwesto sila  si Chief Insp. Wildemar Tiu sa Waterfront Police Station; Chief Insp. Aileen Recla sa Parian Police Station; Chief  Insp. Ryan Devaras sa Mabolo Police Station ug Sr. Insp. Jul Mohammad Jamiri sa Pardo Police Station. WC(BANAT NEWS)