Pito angol sa bangga

CEBU, Philippines - Pito ang naangol dihang nagkarambola ang usa ka multicab ug tulo ka mga gikasugat niining motorsiklo didto sa barangay Mojon lungsod sa Bantayan sa isla sa Bantayan niadtong miaging Sabado sa alas 5:00 sa hapon.

Ang mga naangol mao ang drayber sa motorsiklo nga si Francis Micheal Cabigon,26,  taga Pagsabungan siyudad sa Mandaue ug ang angkas niini nga iyang uyab nga si Charice Mae Caballero, 20, taga Talisay City. Ang ikaduhang naangol mao ang drayber sa laing motorsiklo nga si Daryl Alfafara, 27, taga Mandaue City gihapon ug ang angkas nga si Francis Cabigon amahan sa unang drayber sa motor nga na-angol ug pulos taga Mandaue City gihapon.

Samtang ang ikatulong naangol mao ang drayber sa lain usab nga motorsiklong nadasmagan nga mao si Placedo Canares, taga P. Del Rosario Extension sa dakbayan sa Sugbo.

Ang drayber sa gikadinasmagay nila nga multicab mao si Siferino Giducos alyas Pinoy,43, taga barangay Mojon sa lungsod sa Bantayan ug dunay pasahero sa atubangan nga si Walter Bero.

Matud ni PO3 Lou Susvella sa Bantayan Police Station dihang nahinabi sa Banat News ang mga biktima nga nagmotor nagsunod nga gikan sa Sta. Fe ug paingon unta sa lungsod sa Madredijos samtang sugat nga direksiyon ang multicab nga gikan barangay Obaob.

Apan pag-abot nila sa maong lugar gikatahong nikalit lang og liko ang multicab ug ang mga nagmotor nga mga biktima nga  kusog usab ang dagan naglisod na sa paghunong ug nalahos silang tulo sa maong multicab.

Tungod sa kakusog sa pagbangga nangalagpot ang tanang sakay sa tulo ka motorsiklo ug nitugpa sa kongkretong dalan.

Ang tanang drayber sa motor ug ilang angkas ingon man ang drayber sa multicab ug pasahero pulos gidala sa Bantayan District Hospital tungod sa mga pangos ug samad niining nangkon.

Apan ang duha nga sila si Alfafara ug Francis Cabigon nagrabehan ug gibalhin sa tambalanan sa Cebu City, gisusi pa sa mga imbestigador kung kinsa sad-an sa maong hitabo. (/EIM) (BANAT NEWS)