MCWD ipa-korte ni Rama

CEBU, Philippines - Pwerteng sukoa ni Mayor Michael Rama ngadto sa kadagkoan sa Metro Cebu Water District (MCWD) nga mitugot sa ilang kontraktor nga mohimo’g daghang lungag daplin sa karsada nga nakaapekto sa pag-agi sa mga sakyanan.

Matud ni Rama nga nabantayan niya ang dagko ug taas kaayo nga lungag daplin sa karsada gikan sa Talamban paingon sa Barangay Bacayan nga nakatampo sa kahuot sa mga sakyanan nga mapugos sa pagpahinay pagdagan.

Giawhag ni Rama ang mga abogado sa dakbayan nga tun-an kun makahimo ba kini og lakang-legal batok sa MCWD aron mahunong na kining ilang binuang nga lungag-lungagan ang dalan nga dili dayon tabonan.

Ang MCWD daan na nga mipahibalo nga aduna sila’y expansion project sa mao nga dapit duol sa Talamban aron pagpalambo sa ilang serbisyo apan si Rama miingon nga mahimo kini nga anam-anamon sa paglungag ang karsada.

Ang mayor miingon nga ang MCWD mihimo og taas kaayo nga paglungag sa karsada apan hinay kaayo ang pagbutang nila og tubo sa tubig alang sa ilang proyekto.

Matud ni Rama nga sa ubang kanasuran ang paghimo og proyekto itumong sa gabii  ug inigkabuntag dili na gani makabantay ang katawhan.

Ang mayor miingon nga wala na siya’y plano nga makigtagbo sa mga opisyal sa MCWD kay ang iyang tinguha mao nga aksyonan dayon ang iyang reklamo.

Sayo pa, si Konsehal Edgardo Labella nga nagpuyo na karon sa Barangay Bacayan maoy mireklamo sa proyekto sa MCWD. Ang lungag sa proyekto sa tubig nga molagbas sa karsada nakahasul g’yud sa mga motorista.

Kini tungod kay ang kontraktor sa MCWD dili dayon motabon pagbalik sa giguba nila nga bahin sa karsada. (BANAT NEWS)