Takas sa Talisay gisaulog

CEBU, Philippines - Sa kasaulogan kagahapon sa ika-68th Takas sa Talisay si Kongresista Eduardo Gullas sa unang distrito sa Sugbo mihatag kini og yukbo ngadto sa mga beterano sa World War II.

Ang nahisgutang kasaulogan kagahapon gipahinungod alang sa mga beterano kinsa mibuhis og dugo alang sa kagawasan nga atong natagamtam karon. Si Gullas sa iyang pagpamulong nagkanayon kini nga ang mga beterano nagpakita kini sa kaisog, patriotism ug pagmahal sa nasud alang sa kagawasan sa tanan.

Tipik sa pamulong ni Gullas ang iyang paggama og House Bill 3496 nga nagdeklara nga ang Marso 26 matag tuig usa kini ka special working holiday sa tibuok probinsiya sa Sugbo.

Ang maong bill napalabang sa Kongreso niadtong Oktubre 15, 2012 ug usa ka buwan ang nakalabay napalabang usab kini ngadto sa Senado ug nahimo na kining balaod nga maong Akta Republika 10359 kon “an act declaring March 26 of every year as a special working public holiday in the province of Cebu to commemorate the historic liberation of Cebu from the Japanese occupation during World War II”.

Ang maong balaod napirmahan kini niadtong Enero 9, 2013 ni Presidente Benigno Aquino III. Sa laing bahin, sama sa naandan dunay gipahigayong paghalad sa lukong sa mga buwak kinsa sila si Gullas ug si Commodore Reynaldo Yoma, commander sa Naval Forces Central uban sa mga opisyal sa siyudad pinangulohan ni Mayor Socrates Fernandez ang  mihalad niini diha sa liberation shrine.

Dunay gipahigayon usab nga pag-isa sa bandila sa Pilipinas, Amerikano ug Hapon dayon gisunod ang 21 gun salute.

Ang labing gipaabot sa tanan mao ang re-enactment diha sa baybayon sa barangay Poblacion diin usab nahimutang ang liberation shrine. Aron masama og tinuod dunay gipangbutang nga mga eksplosibo diha sa baybayon nga kintahay mga bomba ug sama sa dunay nagsinukliay sa mga bala.

Si Lieutenant Junior Grade Edsell Divina, Public Affairs Officer sa Naval Forces Central mibutyag kini sa mga tigbalita kagahapon nga ang Central Command maoy mipadala og personnel sa tibuok kalihukan sa civic military parade ug wreath laying.

Matud niya nga kagahapon ang misalmot sa re-enactment mao ang patrol gunboat 140 Barko ng Republika ng Pilipinas (BRP) Emilio Aguinaldo ug BF 341, duha sa rubber boats ug chopper sa Philippine Air Force nga misabwag ug mga buwak.

Dunay mga Philippine Navy Seal ug mga Navy reservist ang apil sa re-enactment kagahapon.

Sa laing bahin usab, bisan unsa ka higpit ang pagbantay sa kapolisan sa palibot kagahapon duna gyuy nabiktima sa pagpanguot.

Ang nahisgutang biktima nga si Arman Tapio Balurio, 26, taga sitio Nonoc, barangay Tabunok ang nakuotan sa iyang iphone-4 nga nagkantidad og P25,000.

Ang deputy sa Talisay City Police Station nga si Senior Inspector Alan Cuizon nagkanayon kini nga si Balurio nalingaw kini sa re-enactment hinungdan nga wala makabantay nga gikuot ang iyang iphone gikan sa gamay’ng sling bag nga iyang gikwentas.

Ang kapolisan nagpahigayon kagahapon og follow-up operation sa maong hitabo.

Hinuon matud ni Cuizon nga malinawon ug malampuson ang kasaulogan sa Takas sa Talisay.

Kagahapon si acting governor Agnes Magpale, Bokal Julian Daan ug Serie Restauro ug mga opisyal sa kasundalohan ug kapolisan ang mitambong sa nahisgutang kasaulogan. (BANAT NEWS)