Polis ug asawa angol sa disgrasya sa motor

CEBU, Philippines - Angol ang polis  ug ang  iyang  asawa human  madasmag  sa   gikasugat nila  nga  motorsiklo  ang  motorsiklong  ilang  gisakyan  didto  sa barangay  Gabi, lungsod  sa Cordova  sa miaging  gabii.

Ang naangol mao si PO2 Erwin Rebada sa Cordova Police Station   ug  ang  asawa  niini  kansang  ngalan  nakalimtan  sa  polis  nga misuwat  niini  sa blotter.

Sumala pa  ni SPO1 Danny Alburo sa kapolisan sa maong lungsod nga nagsakay   si PO2  Rebada  sa iyang  motorsiklo  ug angkas  niya  ang  iyang  asawa  paingon sa barangay Poblacion.

Apan pag-abot sa   maong dapit  nasugatan nila ang motorsiklo nga gimaneho ni Bernie Lawag nga nagsigsag  ang dagan nga  misangpot  sa  ilang  pagdinasmagay.

Nalamba sa karsada    ang  duha ka motorsiklo ug  ang  mga  biktima  nangalagpot  ug  napantok  ang  ilang  ulo  sa   sementadong  karsada  sa ilang   pagtugpa, samtang  si Lawag  way  bun-og  ang  lawas.

Ang  duha  ka angol  daling  gihatud  sa  mga nakasaksi  ngadto  sa Mactan Doctor’s  Hospital sa dakbayan sa Lapulapu.

Si SPO1 Alburo miingon nga luwas na hinuon sa kakuyaw ang mga biktima ug  si Lawag nga nagdala sa motorsiklo nga ilang gikasungag dali usab  nga  mitahan   ngadto sa buhatan sa kapolisan sa maong lungsod. (BANAT NEWS)