Motor nalimbuwad 1 patay 1 angol

CEBU, Philippines - Namatay  ang usa  ka lab-asira, samtang  na-angol   usab  ang anak niini   nga  drayber sa motorsiklo nga  ilang  gisakyan  human  kini  malimbuwad  didto sa barangay San Rafael sa lungsod sa Barili niadtong Domingo sa alas 10:00 sa gabii.

Ang biktima nga patay na  nga  nahidangat sa tambalanan mao si Teofla Sarcol, 61, ug  manindahay   og  isda sa merkado sa maong lungsod, samtang   ang  naangol mao ang drayber sa motorsiklo nga Honda Wave, kolor puwa nga  si Ronald Enyong, 23, ulitawo apan  may kapuyo nga si Annalou Sarcol, hingkod,   ug anak  sa namatay   kinsa  pulos mga molupyo sa barangay Minolos,Barili.

Si PO1 Florentino Cuadero sa Barili Police Station  mibutyag  sa Banat News  nga ang mga biktima paingon na untang mamauli   gikan  nga  naninda og isda sa merkado.

Apan sa  ilang  pag-abot  sa maong lugar  gilihayan  ni Enyong  ang  usa  ka  lim-aw  sa karsada. 

Apan  sa  iyang  pagbawe  sa   manobela  mideretso  og  katurandos  ang  ligid  niini   sa dangog  nga  karsada  hinungdan  sa pagkalamba  sa motor  ug  ang  duha  ka  mga  biktima  pulos  nangalagpot.

Gumikan  sa pagkapantok  sa ilang  mga  ulo  sa sementadong  karsada  maoy  nakaingon  sa kamatayon  ni Sarcol  ug  pagkaangol  ni Enyong.

Nadala  pa  ang  duha  ngadto  sa Barili District hospital  apan  patay  na  si  Sarcol  sa pag-abot  didto  samtang  si  Enyong  maoy  kasamtangang  gitambalan  pa  sa maong  tambalanan. (/WC) (BANAT NEWS)