Aboitiz mibubo og hinabang sa Lapulapu

CEBU, Philippines - Ang Lapu-Lapu City Government usa sa mga nakadawat  sa  mga nagkalainlaing  kahimanan sa hospital ug mga pasilidad sa edukasyon gikan sa Aboitiz Foundation Inc.

Ang nadawat  sa  maong  syudad  mao  ang 17 ka katre sa hospital, 17 ka bassinet ug 13 ka ceiling fan  nga  didto iinstalar   sa bag-ong giayo   nga Pedia ug OB-Gyne ward.

Ang  bag-ong mga ward nga giinagurahan dili  pa dugay  gigastohan  sa  Aboitiz Foundation Inc.

Ning bag-ohay lang mipirma og usa ka Memorandum of Agreement (MOA) ang syudad sa Lapu-Lapu ug ang Aboitiz Foundation alang sa konstruksyon sa duha ka andana ug unom ka classroom building  sa Babag National High School.

 Si Mayor Paz Radaza sa syudad sa Lapu-Lapu mao ang mipirma sa MOA alang sa syudad sa Lapu-Lapu samtang si Executive Vice President and Managing Trustee Augusto Carpio III mao ang mipirma sa ngalan sa Aboitiz Foundation.

Matud pa ni Radaza nga ang datos gikan sa National Statistic Coordination Board (NSCB) sa nasud mipakita nga ang syudad sa Lapu-Lapu usa sa duha ka mga syudad nga migasto  pag-ayo sa health care sa tuig 2009  base  sa per capita niini.

“I believe that if we want to win the war on poverty we must focus our attention on health and education. The public-private partnership with Aboitiz Foundation Inc indeed allowed the city to provide quality services to our people not just in health but also in education,” kini matud pa ni Radaza.

Gisubli sa mayor ang iyang dakong pasalamat ngadto sa Aboitiz Foundation Inc. ug ni Augusto P.l. Carpio III tungod sa ilang pagsalig ug suporta sa iyang administrasyon  kay ang ilang syudad limitado kaayo og pundo apan  daghan  kaayo  og  mga  prayoridad dili gayud makasugakod sa tanang panginahanglan sa mga tawo  gawas  kung abagan  kini  sa pribadong  sector  sama  sa gibuhat  sa Aboitiz Foundation.  (BANAT NEWS)