Mananga gibantayan na’g polis

CEBU, Philippines - Ang police outpost diha sa sitio Mananga, barangay Tabunok, dakbayan sa Talisay gi-renovate sa milabay’ng semana ug duna nay mga polis nga nagpundo niini.

Kahinumduman nga ubay-ubay na usab ang nabiktima sa pagpanulis diha sa maong lugar hinungdan nga daghan ang nabalaka ilabi na kadtong mga pasahero sa PUJ nga moagi diha sa Mananga dihang ang police outpost wala nay polis nga nagpundo.

Kahinumduman usab nga si PO1 William Mangubat kinsa migukod sa mga tulisan nga mitulis sa mga pasahero sa PUJ ang napatay sa mga tulisan diha ubos sa tulay sa Mananga niadtong tuig 2011.

 Si Superintendent Elmer Lim, officer-in-charge sa Talisay City Police Station sa pakighinabi niini sa Banat News nagkanayon nga sa ilang talaan ang Tabunok maoy dunay taas og gidaghanon sa insidente sa kawat.

Gikan sa buwan sa Enero hangtud Pebrero niining tuiga mikabat ngadto sa 19 ka insidente sa kawat ang nahitabo sa Tabunok samtang siyam sa  barangay Poblacion, pito sa San Roque, unom sa San Isidro ug lima sa Lawaan II. Sukad niadtong buwan sa Enero hangtud Pebrero mokabat na sa 20 ka mga kawatan ug tulisan ang nasikop sa kapolisan sa Talisay 10 niini mga notado.

Gibutyag ni Lim nga miduol siya sa mga kapitan sa kabarangayan aron matabangan sila sa pagsumpo sa krimen.

Matud sa OIC nga nakigsabot siya sa kapitan sa barangay Tabunok kabahin diha sa police outpost sa Mananga.

Ang outpost gi-renovate na kini sa milabay’ng semana ug pabutangan na usab kini og linya sa kuryente ug mga gamit sama sa lamesa, radyo ug uban pa.

Si Lim nagkanayon nga iyang gilauman nga karong semanaha maimplementar na ang tanang plano nila diha sa outpost sa Mananga.

Unom ka mga polis ang gidestino diha sa outpost diin bahinon kini sa tulo ka shifting ug gawas niini ang usa ka mobile patrol car anha usab magpundo sa lugar.

Gawas sa mga polis si Lim mihangyo sa kapitan nga magbutang usab kini og tanod diha sa outpost nga maoy mogiya sa mga polis o ba kaha mahibilin kung dunay alarmahan.

Si Lim midugang nga kanunay usab ang ilang pagpahigayon og mga saturation drive batok sa mga ilegal nga mga kalihukan sama sa ilegal nga drugas ug sugal diha sa mga lugar sa siyudad. (BANAT NEWS)