Mga pasundayag sa Kadaugan sa Mactan gihan-ay

CEBU, Philippines - Nahan-ay na ang nagkadaiyang indigay nga gikatakdang pagahimoon sa pagsaulog sa  Kadaugan sa Mactan karong tuiga  gawas sa reenactment sa panag-engkuwentro ni Magellan ug Lapulapu.

Si Konsehal Harry “Don” Radaza nga maoy chairman sa maong  kalihokan,  mibutyag atol  sa press conference nga gipahigayon  nga  may  giandam  nga  mga nagkadaiyang  bangga   nga ilang pasiugdahan nga naglakip sa  Kadaugan Street party competition,  Higante Cospaly Contest, gourment walk contest, firework  show, car show, live band ug uban pa.

Matud pa ni Konsehal Radaza nga ang Kadaugan Street party maoy mohatag  og  dakong  bahin  sa maong kasaulogan nga pagasundan sa rampada  sa  pulos  babaye nga performer  kinsa magsul-ob sa ilang  sexy  kaayong  sapot apan   dili ngil-ad  tan-awon  sa publiko.

Gitataw niya nga kini ang hinungdan nga usa ka semana sa dili pa moabot ang adlaw sa maong kasaulogan   ila  na  nga sutaon ang maong  mga  sapot nga isul-ob sa mga  dancer  aron  pagsiguro nga  dili  kini  mohatag  og law-ay  sa  maong kasaulogan.

Matud  pa  ni  Radaza  nga  ang mahimong Rayna Bulakna  nagkinahanglan nga mopakita isip relihiyuso nga imahen  unya  sexy kaayo  og  panapot  nga  sarang  makapadani  sa  mga  mata  sa mosil-ing  niini  ilabi  na  sa  mga  lalaki.

Ang kantidad nga madawat   nga ganti sa matag mananaug sa indigay sa Rampada mao ang P150,000 alang sa unang ganti, P100,000 sa ikaduhang ganti, P75,000 alang sa ikatulong ganti.

Samtang sa open division makadawat og P200,000   ang unang ganti, P150, 000 alang sa ikaduha , ug P100,000 alang sa ikatulong ganti ug  P50,000 ang madawat sa unang ganti sa mananaug sa higante, P35,000 ang ikaduha ug P20,000 sa ikatulo ug P10,000 ang ikaupat nga mananaug. (BANAT NEWS)