Duha ka polis nag-unay

CEBU, Philippines - Duha ka-manag-agaw nga pulis ang patay human nagpinusilay tunga-tunga sa ilang panaglalis sa sitio Eyha, Barangay Guadalupe Sabado sa gabii.

Ang mga namatay nga pulis mao silang PO1 Anthony Gonzales, 29, kinsa nadestino sa Siquijor Provincial Police Office  ug si PO1 Rey Gabutan, 30, nadestino sa Guadalupe Police Station sa Cebu City Police Office (CCPO).

Sumala  pa sa inisyal na imbestigasyon nga gipahigayon sa Homicide Section sa CCPO, si Gabutan ug Gonzales, kinsa 4th degree cousins, anaa sa sala sa balay sa ilang amiga ug silingan nga si Natalie Apostol nag-inom sa dihang mitumaw ang panaglalis tali kanilang duha.

Si Gonzales ang niibot sa iyang armas nga usa ka kalibre .45 nga pistola ug gipusil si Gabutan makadaghang higayon. Si Gabutan, bisan pa man samdan na, ang nakaibot pa sa iyang giluklok nga kalibre .38 nga revolver ug gipusil si Gonzales.

Gidala ang duha ka magkababata sa Chong Hua Hospital apan gideklarar nga dead on arrival si Gonzales ug namatay usab si Gabutan pipila ka oras ang milabay. Sumala pa ni Senior Supt. Mariano Natu-el, sa pakighinabi sa Banat News, nga nitumaw ang panaglalis sa duha sa dihang gitambagan ni Gabutan si Gonzales.

“Gusto man daw mo-transfer ni si Gonzales sa CCPO gikan sa Siquijor unya gitambagan siya ni Gabutan nga ‘kung gusto ka ma-transfer ka diri, usba nang imong kinaiya,” suma pang Natu-el, wala hinuon masayod si Natu-el kung unsa gipasabot nga kinaiya nga giawayan sa duha.

Gihulagway ni Natu-el nga dili hubog ang duha kay matud pa sa nakuhang impormasyon, duha pa lang ka botelyang beer ang nainom ni Gonzales kuyog ang ilang amigong polis nga si PO3 Arnel Palanas ug PO2 Lejay Gumandal samtang si Gabutan bag-o pang naabot sa dihang nahitabo ang pinusilay.

Ang CCPO officer-in-charge nagkanayon nga wala’y foul play sa maong panghitabo apan gipaubos sa paraffin test si Palanas ug Gumandal ingon man gipaubos sa ballistic test ang ilang mga armas “to erase possible doubts” nga dunay foul play.

Si Natu-el nagkanayon nga bawal gyud unta magdala og armas ang duha kay gawas sa off-duty sila, gun ban usab.

Ang director sa Police Regional Office 7, sa iyang press statement, ang nimando kang Natu-el nga magpahigayon og halawom nga imbestigasyon sa nahitabo.

“This is a despicable act manifesting a clear breach of discipline particularly on the party involved who did the provocation, the unlawful aggression and ignored his standing order to strictly comply on Comelec laws especially on prohibition of carrying firearms by PNP personnel while not on official duty,” matud pang Garbo.

Ang mga patay’ng lawas anaa karon gipanghaya sa ilang tagsa-tagsa ka panimalay sa Barangay Guadalupe. (BANAT NEWS)