Pito ka pagpamusil ‘giangkon’

CEBU, Philippines - Masulbad na unya ang pipila ka mga krimen nga gikalambigitan sa pagpamusil dinhi sa Sugbo nunot sa pagka-neutralized ug pagkasikop sa lider sa mga guns-for hire nga nagbase sa Polpogan, Consolacion.

Pito ka shooting incidents nga naglambigit sa ‘riding-in tandem’ ang gisubay nga posibleng konektado sa grupo ni Francisco “Boyet” Ariva kansang mga sakop napusilan patay niadtong Huwebes sa buntag diha sa Polpogan.

Si Ariva nadakpan sa mga sakop sa Provincial Intelligence Branch niadtong Huwebes sa gabii sa panimalay sa iyang higala pipila lang ka lakang gikan ra usab sa iyang panimalay diin mahitabo ang shootout.

Ang hepe sa PIB, Supt. Rodulfo Albotra mibutyag sa Banat News nga padayon pa ang ilang gipahigayong tactical interrogation kang Ariva.

Matud pa ni Albotra nga hinay-hinay nang miangkon si Ariva sa ilang mga involvement sa pipila ka krimen ilabi na sa lungsod sa Consolacion.

Sumala pa ni  Albotra, miangkon si Ariva sa pito ka mga dagkong “shooting incidents” nga ‘gitrabaho’ sa ilang grupo.

“Naa siyay gipang-ingon, maybe several cases might be considered close,” pasabot pa ni Albotra. Dugang pa ni Albotra nga hinay-hinay nang mikooperar kanila si Ariva apan kinahanglan pa nilang i-verify ang mga gipangtug-an niini kabahin sa aktuwal nga mga insidente.

Gibutyag usab ni Albotra nga gimandoan ni Ariva ang mga sakop nga kung ma-corner sila sa mga polis dili lang gyud mosukol.

“Ana bitaw ko nila sir nga ayaw mo’g sukol sa polis, ambot nila nganong misukol sila sir,” matud pa ni Albotra sa gitug-an kaniya ni Ariva.

Napatay niadtong Huwebes sa buntag sila si Vicente Judaya, Ian Siacol, Jerson Rema ug Rene Boy Tariao tungod sa pagsuway og sukol sa raiding team sa kapolisan.          

 Nasikop usab sa maong adlaw sila si Elvira Manlisi ug Jerry Bugtay kinsa pasakaan og kasong paghupot sa ginadiling drugas, drug paraphernalia, armas ug eksplosibo. (BANAT NEWS)