BOPK mibabag sa Team Rama paghimo’g pulong-pulong

CEBU, Philippines - Mga dumadapig sa Bando Osmeña Pundok-Kauswagan (BOPK) mibabag sa mga kandidato sa Team Rama nga makapahigayon  og pulong-pulong didto sa Sitio San Miguel sa Barangay Apas.

Nahitabo ang grabeng lantugi tali sa mga dumadapig sa duha ka politikanhong grupo nga nakadapit gani og pagtagad sa kapolisan nga miresponde didto sa maong dapit.

Si Apas Konsehal Allan “Sharp” Mahait mipasabot nga aron paglikay sa kagubot, ang Team Rama mibalhin na lang didto sa sports complex sa ilang pulong-pulong.

Matud ni Mayor Michael Rama nga sayop ang gihimo sa mga opisyal sa homeowners association sa Sitio San Miguel nga midili kanila nga makahimo og pulong-pulong.

Si Rama nagkanayon nga una pa kini nga nahitabo nga adunay mibabag sa Team Rama sa pagpahigayon og mini-rally o pulong-pulong.

Nagkanayon si Rama nga kun adunay susama nga panghitabo sa umaabot nga mga adlaw posibli nga mohimo na sila og lakang-legal kay ang susama nga kalihukan maisip nga illegal.

Si Apas Barangay Kapitan Ramil Ayuman miingon nga pugson g’yud unta nila ang pagsulod sa venue apan gitambagan sila ni Konsehal Edu Rama nga mobalhin na lang sila og laing lugar.

Ang dapit nga himoan unta og rally sa Team Rama mao kadtong luna nga giangkon nga iya ni Mariano Godinez nga gitabangan ni Kongresista Tomas Osmeña aron dili madayon ang pagdemolis sa ilang kabalayan.  (BANAT NEWS)