Gipunggotan og ulo

CEBU, Philippines - Usa ka patay’ng lawas nga gipunggotan og ulo ang napalgan diha sa usa ka mabaw nga gilubngan sa sitio Kamaisan, barangay Tulotulo sa lungsod sa Consolacion ang giugkat sa kapolisan.

Ang patay’ng lawas  iya ni Ramil Apa nga usa sa lima ka mga lalaking gitumbok nga maoy mipatay sa polis nga si PO3 Alberto Datu sa milabay’ng bulan sa Pebrero diha sa sitio Tigbao barangay Talamban ning syudad sa Sugbo.

Kagahapon sa buntag, ang mga sakop sa City Intelligence Branch ug Homicide Section sa Cebu City Police Office miadto sa dapit human makadawat og impormasyon bahin sa gikahimutangan sa patay’ng lawas ni Apa.

Matud pa sa hepe sa kapolisan sa dakbayan sa Sugbo Sr. Supt. Mariano Natuel Jr. nga pipila ka adlaw na nga na-missing si Apa .

Ang biktima gilubong sa bukirong bahin sa maong dapit nga usa ka pribadong luna nga nalibotan og taas kaayong koral, lawas lang ang nakuha sa mga polis ug walay ulo.

Apan una pa nakuykuyi ang gilubngan sa giputol nga ulo sa maong dapit, usa ka lalaki ang kalit nga mikaratel og dagan hinungdan nga gigukod kini sa mga polis hangtud nga ilang naabtan sa ilang balay.

Ang suspek giilang si Norman Colina nga nasuta nga usa diay ka “middleman” sa mga kontrata sa pagpatay nga binuhatan sa mga guns-for hire sa lungsod   sa Consolacion.Lakip sa gidakop sa kapolisan ang anak niini nga ginganlan og Nico.

Pinaagi usab sa usa ka text sa ilang impormante, nasubay usab sa kapolisan ang  laing  suspek sa pagpatay kang  Apa nga si Elmer Tapayan, nakuhaan usab kini og usa ka granada ug kalibre .38 sud sa U-Box sa iyang motorsiklo.

Si Tapayan maoy mitultol sa kapolisan diin gilubong ang ulo ni Apa nga pipila lang ka lakang gikan sa gilubngan sa lawas.

Pangagpas ni Natuel nga posibling gipusil pag-una si Apa usa pa kini gipunggotan sa ulo  ug gilubong.

Ang teyoriya sa kapolisan nga posibleng misuway og biya sa grupo si Apa . Matud pa sakop kini sa grupo ni Miguel Cantago ug Miguel Bihag nga gitumbok nga responsable sa pagpatay ni PO3 Datu. Gituohang nanabi si Apa kang Colina kabahin sa gihimo nila ni Cantago ug Bihag sa maong polis apan wala kini masayod nga managbayaw si Colina ug Bihag hinungdan nga kini gipatay aron dili na makapiyait pa.

Ang mag-amahang Colina nga gikuhaan sa ilang habig mihimakak sa tanang pasangil nga gibato kanila. Bugtong giangkon sa amahang Colina nga kaniadto tiggamitan siya og ginadiling drugas apan mihunong na siya niini karun.

Nakuha sa kapolisan sa balay ni Colina ang camouflage uniform; duha ka KG-9 submachine pistol; usa ka kalibre .38; usa ka hand grenade; usa ka silencer; usa ka pinote ug nagkadaiyang bala sa klase-klaseng armas.Padayon pa gihapon ang imbestigasyon sa pagpatay kang Datu ug ang koneksyon sa grupo ni Bihag ug sa posibleng pagkasubay na si kinsa ang utok sa pagpapatay sa maong polis. (/EIM) (BANAT NEWS)