Babaye gihikogan sa kapuyo

CEBU, Philippines - Patay nang napalgan sa ilang silingan diha sulod sa ilang balay sa sitio Laray, barangay San Roque, dakbayan sa Talisay niadtong Martes sa gabii ang usa ka 29-anyos nga babaye.

Ang biktima mao si Bridget Garbo, nagpuyo sa maong dapit napalgan kini sa ilang silingan nga si Richel Bautista, hingkod ang panuigon nga wala na maglihok ug ang liog niini dunay gihigot nga polo shirt nga kolor gray.

Ang suspetsado kinsa misibat ug padayon pang gipangita sa mga polis mao ang kapuyo sa biktima nga si Gedioso Uwanan, 23-anyos, residente usab sa maong lugar.

Usa ka residente sa lugar ang mitawag sa kapolisan kabahin sa maog hitabo kinsa si Superintendent Elmer Lim uban nila ni SPO1 Rolando Bastida, PO3 Benedicto Lasque ug PO3 Ferdinand Pablo ug Talisay Rescue Emergency Action Team (TREAT). Si Garbo dali kining gidala saTREAT ngadto sa Talisay City District Hospital apan wala na kini makaabot nga buhi sa maong tambalanan.

Sa imbestigasyon sa kapolisan nga sa wala pa mahitabo ang maong insidente dunay nakakita nga si Garbo ug Uwanan nagsakay kini og traysikad paingon nang mopauli.

Samtang nagsakay sa traysikad ang duha giingong naglalis ug giingong gisiko sa suspetsado ang nawong sa biktima.

Pag-abot diha sa balay nga gipuy-an sa duha pila ka minutos ang nakalabay ang mga silingan diha sa duol nakadungog kini og singgit sa biktima kinsa nangayo og panabang ug nahilom usab kini.

Si Bautista misusi ngadto sa balay sa duha ug mao na lay iyang nakita ang biktimang nagbuy-od nga wala na maglihok ug dunay higot nga kolor gray nga polo shirt sa liog niini samtang ang suspetsado wala na diha sa ilang balay. (BANAT NEWS)