Bala milapos sa buko-buko

CEBU, Philippines - Namatay ang usa ka  lalaki human  molapos ang  bala sa iyang buko-buko  gikan sa dughan  nga   gitugpahan  niini  sa  pagpamusil  nga nahitabo  didto  sa iyang  balay sa barangay Tungkay, siyudad sa Toledo   sa miaging buntag.

Ang biktima mao si Amelito Labajo, 45, ug molupyo sa Proper Tungkay, samtang  ang  mipusil  kaniya  nagpabiling  wala  hiilhi.

Si PO1 Emmanuel Aragon sa Toledo City Police Station  mibutyag  sa Banat  News   nga   sa  wala  pa  pusila  ang biktima,  didto  kini  sa tugkaran  sa iyang  balay  nga  nagbaid   sa iyang sundang.

Apan  wala  kini  kalibotan  nga  gihup-an  siya  sa  kriminal  ug  dihang  nahiduol  na  kini,  gipusil  ang  biktima sa dughan  apan  ang bala  sa wala  hisayring  kalibre  sa armas milapos  sa iyang  buko-buko.

 Si Felix Bacus  nga  tanod  sa maong  barangay  maoy  unang  nakatabang  sa  biktima  ug  misakwat niini nga  nagkadugo ug    gihatud ngadto  sa  pribadong  tambalanan  sa dakbayan  sa Sugbo. Apan  pipila  ka gutlo  samtang  giatiman  kini  sa  mga  doktor, nakabsan  sa iyang  kinabuhi.

  Napunit  sa  kapolisan  gikan  sa dapit  nga  nahitaboan  mao  ang  basiyo  sa bala ug  ang bala  mismo  nga  nalumping   na.

Nasayran  nga  ang  biktima   adunay pending arrest warrant nga   wala  pa  ikasilbi  sa kapolisan  gumikan  sa kaabtik  nga   dili  nila  maabtan  sa iyang  balay.

Ang  maong  arrest  warrant   naggumikan  sa giingong pagkalambigit sa biktima  sa   pagpamaligya  og  shabu   ug  uban  pang matang sa gidiling  drugas  sa kabukiran.

Ang kapolisan padayon pang  miimbistigar  sa  maong  hitabo aron  pag-ila sa  mipatay  sa  maong  biktima  ingon  man  ang motibo sa   maong krimen.

Gisubay  sa kapolisan  kun  di  ba  kaha  may labot  niini  ang  isyu  sa gidiling  druga. (/WC)(BANAT NEWS)