Garbage truck sa Mandaue gitaora’g track devices

CEBU, Philippines - Gitaoran og  tracking devices   ang upat ka mga garbage truck sa dakbayan sa Mandaue sa pagsiguro nga makolekta  ang mga basura  sa kabarangayan  ug  sa kahilitang  mga  lugar  sa maong  dakbayan.

Si Engr. Ricardo Mendoza, hepe  sa  Barangay Solid Waste Management  miingon nga ang tracking devices maoy matang sa kahimanan nga mosuta  kun  nakolekta  ba  ang  tanang  mga  basura  sa siyudad   o  wa.

Gipatuman  kini  tungod  sa mga  pangatarungan  sa daghang  mga  molupyo  nga  wala kuno  magtinarong  paghakot  sa  mga  basura  sa ilang  lugar  ang  mga  trak  sa basura  sa dakbayan.

Gumikan niini napugos  sila  sa paglabay  sa ilang  mga  basura  bisan  asang  dapita.

Si James Abadia nga maoy  administrator sa maong dakbayan  maoy  nagpasiugda   sa iyang sugyot    nga  kinahanglang  ang  kagamhanan  mogamit  og  tracking  devices  aron mamonitor  ang  mga  basurero  kun  nagtinarong  ba  kini   sa ilang  trabaho  sa paghakot ug  pagkolekta  sa basura.

Gitataw niya nga sagad sa   mga garbage collector dili  motuman  sa ilang  schedule  sa  pagkolekta  sa  basura  sa matag  lugar.

Gumikan  niini  naglibog  ang  mga  molupyo  kun  unsang  adlawa  kolektahon  ang  mga basura  sa ilang  dapit  kay   dili  man  magkapareho  ang  mga  adlaw  sa pagkolekta  niini  pinaagi  sa garbage  truck  sa siyudad, matud  pa  ni Abadia.

Dugang pa niya nga kun mapamatud-an  nila  nga  epektibo  ang  maong  kahimanan, taoran  nila  ang tanang  trak  sa basura  sa siyudad  aron  mokugi  ang  mga  basurero sa pagkolekta  sa mga basura  sa kabarangayan  sa maong  dakbayan. (BANAT NEWS)