Seguridad sa pantalan bantayan sa Semana Santa

CEBU, Philippines - Ang Cebu Port Authorities (CPA) andam na sa pag-atiman sa modagsa nga mga pasahero karong umaabot nga Semana Santa.

Atol sa bag-ohay pa lang gipahigayong Kapihan sa Pantalan, ang  mga  opisyal  sa CPA pormal nga milusad sa ilang preparasyon alang sa seguridad sa mga pasahero uban  sa tema  nga  “Oplan Ligtas Byahe: Kwaresma 2013."

Matud pa ni Director Oscar Lopez, manager sa Port Safety and Environment Management Department  sa CPA  nga nakig-alayon na sila sa uban pang awtoridad nga kauban sa maong operasyon .

Ilang  tinguha  nga  ang  tanang  pasahero  sa kadagatan nga modunggo  sa  bisan  asang  pantalan  sa lalawigan  sa Sugbo  mabantayan  pag-ayo.

Pipila  sa peligrong  masugamakan  sa  mga  pasahero  inig-abot  sa  pantalan  mao  ang  mga  mangunguot, mangingilad, tulisan, ug  uban  pang  mga  kriminal  nga  sayon  kaayong  mobiktima  sa  mga  inosenteng  pasahero.

Gipadayag ni Lopez nga sa sayo pa ning semanaha nagbutang  na  sila og   public assistance  desk (PAD) nga maoy  kaduolan  sa  mga  pasahero  nga  makabaton  og  problema  inig-abot  nila  sa pantalan.

Ang  maong  mga PAD kasagaran  anaa  sa  Pier 1, 2 ug 3 nga  ubanan  usab  og  grupo o medical team  nga  may  ambulansya nga  maoy  magamit  dayon  sa panahon  sa emerhensya.   Dugang pa ni Lopez nga ang mga Passenger Liaison Officers (PLO) idestino sa matag pantalan lakip na niadtong mga anaa sa probinsya.

Gitug-an ni Lopez nga ang Pier 1 kasamtangan  pang giayo busa  iyang  giawhag  nga  sabton kini  sa  mga  pasahero.

Sa bahin ni Philippine Coast Guard (PCG) Commander Weniel Azcuna, kini  mibutyag  nga sugod niadtong Martes nag-implementar sila og ilang kaugalingong Public Assistance Center  sa 13 ka detachment sa Sugbo.

Gipadayag ni Azcuna nga nagsugod na sila sa pagpahigayon og flag state inspection  nga  naglangkob  sa  pagpang-inspection  sa mga sakayan nga pasaheroan.

“But other than that, we also focus on the human factor, the mechanical competence of the crew,” kini matud pa ni Azcuna.  Gibutyag usab ni Joy Tumulak sa City Traffic operations and Management (CITOM) nga ang ilang mga personnel ila usab pa-standbayon  sa mga pantalan  aron  makatabang  kini  sa  pagbantay  sa mga  pasahero.

Gipasabot ni Tumulak nga ang walay mga sakyanan ug motorsiklo nga  mo-parking  sa  mga  No Parking Area aron masiguro nga hapsay  ang dagan sa trapiko.

Ang "Oplan Ligtas Byahe: Kwaresma 2013" usa ka direktiba nga giluwat sa Department of Transportation and Communication (DOTC). (BANAT NEWS)