Nasakmit nga “ladies accessories” way papeles

CEBU, Philippines - Gikonpirmar sa Bureau of Customs (BOC) nga walay papeles ang mga nasakmit nga mga mahalong “ladies accessories” nga mikantidad og P100 milyones   gikan sa usa ka tindahan sa dakbayan sa Lapulapu sa milabay’ng semana.

Human   maimbentaryo   ang maong  mga  butang nasuta  sa mga tinugyanan  sa Custom  nga  mini  ang maong mga  accessories ug walay gipakitang dukomento ang tag-iya niini nga nakabayad  siya og buhis niini sa buhatan sa BOC.

Ang  mga nasakmit mao ang  208  ka  mga  relo,778 ka pitaka ,161 ka antiyuhos, 165 ka kaha sa antiyuhos,  36  ka  head bond, 692  ka bag, 8 ka bracelet, 19 ka key chain, 160  ka bakus ,18  ka neck tie, 4 ka catalog, ug  2 ka speaker,  nga  ang tanan gibanabana nga mokabat sa P100 milyones .

Base sa Warrant of Seizure and Detention (WSD) #08-2013 nga giluwatan ni Cebu Customs District Collector Edward dela Cuesta niadtong Marso 15, 2013 ang RB Collection aka; AHA Real Fasion (tag-iya sa maong tindahan ) nakalapas  sa Sec. 2536, Sec. 101, ug  sa Sec. 2530 sa Tariff and Customs Code of the Philippines (TCCP) ingon man sa  RA 8293.

Gumikan niini ,si CIIS Cebu Asst. OIC Franz Angelo Munoz ug Lt. Reynaldo Lascota nagkahiusa sa pagdala sa maong mga nasakmit nga butang ngadto sa bodega sa Collectors Coral  sa  GALCO duol sa buhatan sa Customs Sub-Port of Mactan.

Matod pa ni Sub-Port of Mactan Collector Atty. Paul Alcazaren  nga  maghuwat lamang sila og mando gikan sa ilang uluhang buhatan  alang  sa  pagpaguba o pagsunog  sa mga piniratang accessories, kay dili na kini mabaligya sa merkado  gumikan  sa ilang paglapas  sa lagda sa International Property Rights (IPR). (BANAT NEWS)