Katoliko mihangop sa suspension sa RH Law

CEBU, Philippines - Gikalipay ug gihangop sa Simbahang  Katoliko ug mga Pro-life Advocates sa Sugbo sa gipakanaog   nga  hukom  sa Korte Suprema   sa pagsuspenso  og  120 diyas sa implementasyon sa gikagubtang balaod nga mao ang Reproductive Health (RH) Law.

Matud ni Dr. Rene “Josef” Bullecer, Director sa Human Life International Philippines nga kining maong kamandoan sa Korte Suprema usa ka sinyas nga angayang  ibasura ang maong balaod.

Miingon  si  Bullecer  nga  kining  maong  balaod magtukmod  sa tawo  sa pagpatay   sa bata sulod  sa tagoangkan sa inahan   nga  usa ka  dakong  supak  sa doktrina  sa simbahang Katoliko.

Dugang pa ni Buellecer nga niining upat ka buwan nga pagsuspenso  sa implementasyon sa maong balaod, maoy  mohatag  kanila  og kahigayonan sa pagpangandam sa lig-on  nilang argumento   didto  sa hawanan sa Korte Suprema  uban  sa ilang   mga  ebidensiya ug depensa.

Nasayran nga 10 sa 15 ka mga huwes  sa Labaw’ng  Hukmanan  sa nasud  ang mipabor sa pagpakanaog sa status quo ante order nga gilangkoban nila ni Associate Justices Presbitero Velasco Jr., Teresita Leonardo-De Castro, Arturo Brion, Diosdado Peralta, Lucas Bersamin, Roberto Abad, Martin Villarama Jr., Jose Perez, Jose Mendoza, ug Bienvenido Reyes.

Samtang ang 5 nga misupak sa pagpugong sa implementasyon sa maong balaod gilangkoban nila ni Chief Justice Ma. Lourdes Sereno; Senior Associate Justice Antonio Carpio ug Associate Justices Mariano del Castillo, Estela Perlas-Bernabe ug  Marvic Leonen.

Si Sereno, Bernabe ug Leonen pulos mga tinudlo o appointees ni Presidente Aquino. Kahinumdoman nga dinhi sa Sugbo kusganong gisupak sa  dagkong  mga  politiko ang maong balaod dihang gipanday pa ang maong balaodnon didto sa ubos balay balaoranan . Usa  niini  mao  si suspended  Gov. Gwendolyn Garcia kinsa  misalmot sa gipahigayong prayer rally  sa Fuente Osmeña uban nila ni Cebu Archbishop Jose Palma ug  Cebu Archbishop Emeritus Ricardo Cardinal Vidal.

Samtang didto sa kongreso si Cebu 2nd district Cong. ug Deputy House Speaker Pablo “Pabling” Garcia  kusganong  misupak   ug   milantugi niini aron kapugngan nga mahimong balaod ang RH Bill.

Uban sa misupak nga   mga kongresista nga Sugboanon  sa maong balaodnon mao sila si 1st district Rep. Eduardo Gullas, 3rd district Rep. Pablo John PJ Garcia, 4th district Rep. Benhur Salimbangon, Cebu City north district Rep. Rachel Marguerite “Cutie” del Mar ug ingon man si ANAD partylist Rep. Pastor Jun Alcover Jr.

Suma sa gipasabot  sa maong  balaod  nga  ang  gitanyag sa gobiyerno  nga  kontraseptibo  maoy  pagsanta  nga magkaabot  ang  sperm  cell  ug  egg cell  sa lalaki  ug  babaye  nga  maghilawas  nga nagpasabot  nga   dili  makaporma  og  bata  ilawom  sa tagoangkan  sa usa ka  inahan. Busa  kun  walay maporma  nga  bata  sa ilawom  sa tagoangkan  sa usa  ka inahan,  walay  kinabuhi  sa bata nga mamatay, tungod  kay  wala  pa may bata  nga sulod  ang  tagoangkan  gumikan  sa  kontraseptibo  nga  gigamit  sa magtiayon. (BANAT NEWS)