Mananagat nabalaka sa krudo gikan sa barkong nakaob

CEBU, Philippines - Gikabalak-an sa mga mananagat nga maapektohan ang  ilang  panginabuhi kun moawas  sa  dagat  ang  krudo  gikan  sa tangke sa  mitikyaob nga cargo vessel sa  kadagatan  sa barangay Looc sa dakbayan sa Mandaue sa miaging semana.

Si Lucrecio Arong, 52, minyo, nga taga barangay Pusok, dakbayan sa Lapulapu nga nahinabi sa Banat News mipasabot  nga mameligro  sila  kun  mobuhagay  na  ang krudo  sa ilang  kadagatan.

Matud  pa  niya  nga  manglayas  ang  isda  sa maong  lugar  busa  silang  mananagat  wala  nay  makuhang  isda  nga  maoy  ilang  panginabuhi.

Ang M/V Maria Angelica  Grace nga  kargado  sa  sinakong  semento,  natikyaob  dihang  gikusokuso  kini  sa dagkong  bawod  samtang  nagpundo  sa maong  lugar.

 Ang kadagkoan sa Bureau of Fisheries and Acquatic Resources (BFAR) higpit na karon nga nag-monitor sa kahimtang sa kadagatan sa maong dapit sa posibli   nga  kadaut niini  kun  mosagol  na  ang  krudo  sa dagat. Si Cebu Coast Guard Commander Winiel Azcuna  miingon nga bisan ang tag-iya sa Cabahug Wharf mireklamo  na usab tungod kay   hangtud  karon  wala  pa maugkat  ang  maong barko  nga nakahatag og dakong epekto sa ilang operasyon.

Matud pa niya nga sukad sa pagkatikyaob sa maong cargo ship  ang uban nga mga barko  adto na modunggo sa pikas habig sa pantalan.

Dugang pa ni Azcuna nga si Hector Wong nga maoy tag-iya sa Mandaue Shipping Lighterage Inc. mihangyo  nga  ikasakwat  na  ang  maong  barko  aron  dili na mameligro  ang  maong  lugar  sa  krudo  nga  moagas  sa dagat  gikan  sa tangke  niini.

Nasayran  nga  naproblema  usab  ang  tag-iya  sa maong barko  bahin  sa kompaniya  nga  mosakwat  sa maong  barko  apan  mipasalig  nga  ila  kining  ugkaton  sa dili madugay. (/WC)(BANAT NEWS)