Pharmacy gilungkab P200 mil wagtang

CEBU, Philippines - Mikabat sa  P200 mil  ang kantidad sa salapi  nga  gisakiyo  sa  mga  wala hiilhing    mga  kawatan  nga  milungkab  sa  usa  ka pharmacy didto sa barangay South Poblacion sa lungsod sa San Fernando  sa miaging  kaadlawon.

Ang  gilungkab mao ang  Purchaser Pharmacy nga gipanag-iya ni Catherine Abastor nga nagpuyo sa siyudad sa Talisay.

Si PO2 Jose Claire Palagtiosa sa San Fernando Police Station mibutyag sa Banat News  nga  ang  gibilin   nga nagbantay  sa tindahan  nga  si  Chris Marie Quinemon nanirado   sa  alas 10:00   ang  takna  sa gabii.

Unya misuroy kini uban  sa  iyang hinigugma ug namauli  niana  nang  pagka- alas 2:00 sa kaadlawon.

Apan bisan kaadlawon  na   wala  pa kini mangatulog kay  padayon  pang  nag-estorya  sa likod  sa tindahan.

Sa pagka alas 3:00 sa kaadlawon nakugang na lang   sila  dihang kalit  nga  mipaka ang atubangang bahin sa pharmacy ug  sa  pagsusi  nila   na- abli na  ang  roll -up door  ug  putol  na  ang kandado  niini.

Didto nila mahibaw-i nga gilungkab ang  drawer  sa tindahan  ug  gihurot  og  kawat  ang  tanang  halin  nga  gisud  sa maong drawer  nga  mikabat  og  P200 mil  way labot  sa uban  pang  mga baligya  sama  sa mga kinarton  nga  gatas  nga  gidala  usab  sa mga kawatan.

Ang kapolisan  nga  ila  dayong  gipahibawo  sa maong  hitabo  nakadiskobri sa duha ka kawatan dihang gipasalida nila ang CCTV camera  sa pharmacy  apan naglisod  sila  sa pag-ila   kay  ang usa niini nagtaptap sa nawong.

Gipatawag  sa kapolisan  ang  mga  molupyo  sa maong  lungsod  pamasin  nga adunay  makaila sa mga dagway  sa maong  mga  kawatan  nga nakuha sa CCTV  camera. (BANAT NEWS)