Nibadlong sa nagmaoy nadunggaban patay

CEBU, Philippines - Usa ka 48- anyos nga lalaking nibadlong sa nagmaoy nga hubog ang nadunggaban patay atol sa gipahigayong disco sa Power Plant Site Poblacion siyudad sa Toledo kagahapon sa alas 3:30 sa kaadlwon.

Ang biktima mao si Joel Gamboa, molupyo sa maong lugar samtang ang suspek mao si Jonas Borja.

Matud ni PO1 Emmanuel Aragon sa Toledo City Police Station dihang nahinabi sa Banat News nagmaoy ang suspek tungod sa kahubog ug nakig-away sa sud sa diskohan.

Sumala pa nga gibadlong kini sa biktima ug gipagawas kini sa diskohan, apan wa magdahom ang biktima nga nagdumot diay kini ug gipaabot ang iyang pagpauli.

Ang biktima naputos og samad dinunggaban sa lawas ug daling gihatud sa tambalanan apan gibalhin og tambalanan dinhi sa dakbayan sa Sugbo apan sa labing uwahing report nabugtoan gyud kini.

Wala hinuoy kompirmasyon ang kapolisan kabahin sa uwahing report.

Ang suspek padayun pang gipangita sa kapulisan human kini nisibat pagkahuman sa hitabo.  (BANAT NEWS)