3 -anyos naigo sa saag nga bala angol

CEBU, Philippines - Naangol ang 3-anyos nga batang lalaki kinsa  naigo sa saag nga bala gikan  sa armas  sa  mga lalaking  nagpinusilay   didto  sa sitio Seaweeds sa barangay Pusok, dakbayan sa Lapulapu sa  miaging buntag.

Si  PO2 John Carlo Jocotan sa homicide section sa kapolisan sa maong dakbayan miingon nga kuyog sa iyang apohan ang biktima nga si Christman Cabuyan, 3, nga gikan pa nga nagpalit og sud-an sa usa ka kan-anan sa maong lugar.

Matud pa niya nga samtang naglakaw   sila padulong sa ilang  balay kalit silang  nakadungog  og  buto-buto  sa mga armas de fuego   sa duha ka wala hiilhing lalaki nga nagpinusilay

Dugang pa niya nga human sa maong  buto-buto sa  kalit lang misiyagit sa kasakit ang bata ug sa pagtan-aw pa sa kuyog nga apohan niini, iyang namatikdan nga nagkadugo na ang bukton   sa bata.

Dali nga gidala sa  apohan ang biktima ngadto sa Mactan Doctors Hospital sa barangay Basak sa maong dakbayan ug didto nasuta sa mga doktor nga milapos ang bala sa  bukton  sa  biktima.

Si PO2 Jocotan miingon nga ilang gisusi ang mga molupyo alang sa pag-ila sa mga  nagpinusilay apan ang tanan  pulos lang nangambot ug wala usab sila masayod kun may lain pa ba nga naigo.

Padayon  pang naniid  ang  kapolisan basin  may  makatug-an  sa  ngalan  sa  nagpinusilay  aron  papanubagon  sa  gastoanan  sa  tambal  sa bata  nga  nabiktima. (BANAT NEWS)