Talisay landing gipangandaman sa kapolisan

CEBU, Philippines - Kapolisan sa dakbayan sa Talisay nangandam alang sa ika-68th nga Takas sa Talisay o Talisay Landing karong Marso 26, 2013. Si Superintendent Elmer Lim, officer-in-charge sa Talisay City Police Station nagkanayon nga kanunay ang ilang pagpahigayon og meeting tali sa lokal nga kagamhanan sa siyudad ug sa ubang mga stakeholder kabahin sa pagpangandam sa nahisgutang selebrasyon.

Gilauman nga ang kadagkuan sa kapolisan ug kasundalohan sa probinsiya ug ubang mga lider sa ubang mga lokal nga kagamhanan lakip na si Kongresista Eduardo sa unang distrito sa probinsiya ang motambong niini.

Ang mga beterano nga maoy nagsakripisyo aron makabaton ang tanan og kagawas ang usa sa pahinungdan sa maong kasaulogan.

Matud ni Lim nga sa habig sa kapolisan ang security aron mamentenar ang kahusay ug kalinaw maoy ilang tutokan ug motabang usab sila sa pagmando sa trapiko aron dili maghuot ang karsada nga agian unya sa parada.

Sa laing bahin, gawas sa Takas sa Talisay ang kapolisan nangandam usab sa pagsaulog sa Semana Santa ug sa pagbukas sa kampaniya sa mga lokal nga kandidato karong Marso 29 adlaw nga Biyernes Santo. Ang Semana Santa magsugod karong Marso 25.

Matud sa OIC nga sa   sa prosesyon sa mga simbahan magbutang siya og mga polis ug makig-ayuda usab sila sa City of Talisay Traffic Operation Development Authority (CT-TODA) alang sa pagmando sa trapiko.

Ang  mga simbahan sa Talisay mao ang Santa Teresa de Avila Parish sa barangay Poblacion, Santo Niño Parish sa barangay Mohon, Saint Joseph Parish sa barangay Tabunok, San Isidro Labrador sa barangay San Isidro ug Our Lady of Consolacion sa sitio Laray, San Roque.

Kabahin sa pagbukas sa kampaniya sa lokal nga mga kandidato matud ni Lim nga gianad niya karon ang iyang mga personnel pag-duty gikan sa hapon hangtud sa gabii ug kadlawon.

Matud ni Lim nga kasagaran panahon sa pagpangampanya ang mga kandidato anha na sa gabii hangtud sa kadlawon magpulong-pulong o magpahigayon sa mga kalihukan nila sa pagpangampanya.

Gawas usab niini nabantayan usab ni Lim nga ang krimen sama sa kawat ug mga tulis kasagaran sa gabii hangtud sa kadlawon mahitabo. (BANAT NEWS)